Atualità
Kompatscher a Bruxelles: plann Juncker y program FESR
Le plann dal inom „Juncker“ y sües poscibilités por le Südtirol y por l’Euregio é stades tl zënter dles incuntades da incö (ai 4 de jügn) dl presidënt dla Provinzia Arno Kompatscher a Bruxelles. N'atra tematica é stada le program FESR, che pó pié ia ince por l’Uniun Europeica.
Le program dl Fonds europeich por le svilup regional (FESR) dé jö dal Südtirol y che prevëiga na soma d’investimënc de 136 miliuns de euro por la chersciüda dl’economia y dl setur dl laur local tla perioda danter le 2014 cina l’ann 2020 pó pié ia. Le presidënt dla Provinzia Arno Kompatscher á ciafé incö, jöbia ai 4 de jügn, löm vërda dal diretur general por les politiches regionales dl’Uniun Europeica Walter Deffaa. Le diretur general y sü colaboradus á confermé che les mosöres preliminares é gnüdes stlütes jö y che la Comisciun europeica aprovëia le start dl program.
„Cun le diretur general ái ince albü na debatüda sön les poscibilités dla macoregiun alpina y dles strategies por i raiuns alpins tl contest dl’Euregio“, insciö le presidënt dla Provinzia Arno Kompatscher do l’incuntada, che á invié le commissar a tó pert ala zelebraziun di 20 agn dala nasciüda dla rapresentanza deboriada cun le Trentin y le Tirol da d'altonn a Bruxelles.
N’atra incuntada a chëra che le presidënt Kompatscher á tut pert incö é stada chëra tla Ciasa Tirol olache al é gnü a se le dé na conferënza sön la funziun dles regiuns y sön le plann Juncker. „Tratan la conferënza él gnü debatü dles poscibilités desvalies de finanziamënt por les regiuns“, insciö le presidënt che á instës tigní na relaziun tratan l’incuntada. Atres tematiches analisades é stades l’importanza de proiec cun i raiuns vijins, l'azes poscibl dl’Euregio a chisc proiec y dl sistem regional dles banches. Le presidënt Kompatscher á sotligné l’importanza dl rode dles regiuns, dles provinzies y di comuns, dantadöt por ci che reverda l’atuaziun concreta di investimënc che gniss a se le dé tres le plann „Juncker“. Kompatscher á implü prezisé che la Junta provinziala nominará n responsabl por chësc plann d'investimënc che sará ince la porsona de referimënt por i raiuns vijins. Le plann Juncker é ince gnü traté incö tl Comitê dles Regiuns, te chël che al é ince gnü baié dla chestiun dla migraziun, „debatüda chësta, che ne á indere porté a degun resultat che acontentëia“, insciö Kompatscher.
rc
