Atualità
Les mosöres de sostëgn ales imprejes manajades da ëres é indô azessibles
Löm vërda dala Junta provinziala incö (mertesc ai 9 de jügn) ai critérs nüs por la conzesciun de alisiraziuns a bëgn dles imprejes de erës. Les domandes d’azes ales formes de sostëgn podará gní presentades dal 1 de lugio inant. „Cun chësta dezijiun ún indô daurí döt le sistem de sostëgn dl’economia“, á sotligné le presidënt Kompatscher.
Cun la dezijiun da incö, mertesc ai 9 de jügn, á la Junta provinziala mudé i criters por la conzesciun de alisiraziuns a bëgn de de piceres imprejes y imprejes mesanes che vëgn manajades da ëres. Les domandes por chëstes mosöres de sostëgn podará indô gní fates dal 1 de lugio inant. „Cun chësta dezijiun únse daurí indô döt le sistem de sostëgn dl’economia y stlüt jö le prozes de reforma metü man dala junta nöia“, á sotligné le presidënt Arno Kompatscher incö tratan la conferënza stampa do la sentada dla Junta. I criters nüs prevëiga l’aprovaziun de contribuc de sostëgn por la fondaziun de imprejes nöies (start up), por le start de ativités profescionales, por la surantuta de imprejes y por la cumpra de aziëndes bele esistëntes. Implü él preodü contribuc por investimënc de promoziun de ativités de formaziun y ajornamënt, por la cumpra de sorvisc de consulënza y por zertificaziuns. N’atenziun particolara ti gnará dada a imprejes che fajará investimënc te seturs nia tipics por imprejes feminines o te zones che vëgn conscidrades debles dal punt de odüda dla strotöra economica.
Danter les novités di crites nüs él da ciafé l’eliminaziun de n valgönes formes de sostëgn che vëgn finanziades tres la lege sön l’inovaziun y la revijiun dles somes de spëisa plü altes y plü bases. Por ci che reverda i investimënc d’imprejes é le limit plü bas gnü alzé da 3.500 a 5 mile euro, por ativités d’ajornamënt mëss la spëisa ester de almanco 2mile euro (cina sëgn êl preodü n investimënt plü bas de 1.000 euro).
Les domandes do n contribut de sostëgn por imprejes manajades da ëres pó gní presentades tl Ofize Artejanat dal 1 de lugio inant cina ai 31 de dezëmber dl 2015. Le proscim ann sará la perioda por fá domanda dai 2 de jená ai 30 de jügn. Les alisiraziuns gnará conzedüdes tolon en conscidraziun ince les domandes bele dades jö y nia ciamó aprovades.
rc
