Parch nazional dl Stelvio: Balsan y Trënt se partësc sö i cosć de gestiun
Tres plü daimpró röia por le Südtirol la gestiun autonoma dl parch nazional dl Stelvio. Do la sotescriziun dl’acordanza a Roma tl mëis de forá á la Junta provinziala aprové incö (ai 9 de jügn) n protocol d’acordanza danter le Südtirol y le Trentin che reverda la spartiziun te pertes anfat di cosć de gestiun.
Les provinzies de Trënt y Balsan se partësc sö 50 porcënt porom i cosc de gestiun dl Parch nazional dl Stelvio.„Les spëises che reverda la gestiun dl Parch nazional dl Stelvio – á sotligné le presidënt dla Provinzia Arno Kompatscher – ne portará nia para cosć implü por la Provinzia de Balsan deache ai fej pert dl fonds di comuns confinanc. L’acordanza concordada a livel nazional prevëiga che les provinzies de Balsan y Trënt paiará ince i cosć de gestiun dla Regiun dla Lombardia." La Junta provinziala á aprové incö, mertesc ai 09 de jügn, le protocol d’acordanza che partësc sö i cosć te pertes anfat dl 50 porcënt porom danter le Südtirol y le Trentin, ince dles spëises che ti spetass ala Lombardia. „I ún acordé na spartiziun valia ince sce la pert de teritore aministré dala Provinzia de Balsan é dër plü grana co chëra dla Provinzia de Trënt“, á ajunté Kompatscher. L’acordanza arjunta cun Roma prevëiga inant l’istituziun de n Comitê paritetich de coordinamënt y de organisaziun unitara dl parch. La gestiun autonoma dl Parch nazional dl Stelvio é un di obietifs prinzipai dla politica che reverda les competënzes autonomes dl Südtirol.
rc
Galaria dales fotografies
Les provinzies de Trënt y Balsan se partësc sö 50 porcënt porom i cosc de gestiun dl Parch nazional dl Stelvio.
