Atualità
Dala Junta: acoliënza di migranc, strotöres te döt le raiun provinzial
La Junta provinziala á traté incö (ai 9 de jügn) la chestiun che reverda l’organisaziun dles strotöres d’acoliënza de migranc sön döt le teritore. La Junta á aprové na proposta dl’assessuria Martha Stocker che prevëiga la destribuiziun di migranc che damana do asil sön dötes les comunités comprensoriales dla Provinzia. La sora ezeziun é Balsan.
„Les strotöres individuades ne é nia bele davertes, mo gnará arjignades ca man man ti caji che le govern nazional ess da spartí sö atri migranc sön döt le teritore dla Talia“, á splighé incö (09/06) le presidënt dla Provinzia Arno Kompatscher. Cun chësta dezijiun dla Junta da incö dessel gní spartí sö te na manira plü iüsta sön döt le teritore provinzial les porsones che damana do asil tl Südtirol y te chësc contest él gnü fat n’ezeziun por la cité de Balsan, „deache la capazité d’acoliënza dla cité é bele gnüda arjunta“, á dit Kompatscher.
Les strotöres é gnüdes individuades adöm ai Comuns y ales Comunités comprensoriales. Al se trata de: la ciasa de palsa da denant de Mals, la sënta da denant dl zënter de reabilitaziun „Salus“ a Tisens, la Ciasa di lauranc dlungia la staziun dla ferata da Maran, la caserma „Mercanti“ a Eppan, le frabicat dles monies de Ciastel, le „Fischerhaus“ a Vintl, la ex-caserma „Gnutti“ a Pfitsch (Alta Val d'Isarch) y le „Josefsheim“ a Bornech. „Cun la metüda a desposiziun de plü strotöres sön döt le teritore – á sotligné le presidënt Kompatscher - pól gní garantí n'integraziun plü saurida dles porsones migrantes tla sozieté. L’assessuria Martha Stocker s’incuntará tosc cun i ombolc y les assoziaziuns interessades por organisé i proscimi vari y la gestiun dles strotöres.“
rc
