Atualità
Consul dl’Austria Spadinger incunta l’assessur ladin Mussner
Le consul general dl’Austria a Milan, Wolfgang Spadinger á incunté incö, jöbia ai 11 de jügn l’assessur ladin Florian Mussner: tratan l’incuntada él gnü traté la situaziun di Ladins dl Südtirol y en general dles Dolomites.
Sciöche consul general dl’Austria a Milan é Spadinger ince competënt por Südtirol. A Balsan s’ál incunté incö, jöbia ai 11 de jügn dl 2015 cun l’assessur ladin Florian Mussner olache le consul á sotligné süa desponibilité de colaboraziun cun la mendranza ladina. L’assessur ti á splighé al consul la situaziun di Ladins en general y spezificamënter tla Provinzia de Balsan. Mussner á sotligné che le Consulat dl’Austria a Milan é sté tresfora dër bun informé ti ultims agn sön la situaziun di Ladins dl Südtirol y s’á desmostré contënt che Spadinger á bele instëss dër na buna conescënza sön la cultura y les carateristiches dl grup linguistich ladin.
Spadinger y l'assessur Mussner á concordé da se incunté plü sovënz por n barat d'informaziuns monü.
Wolfgang Spadinger é iurist y é gnü nominé dal Minister por i afars cun l’ester Sebastian Kurz sciöche suzessur de Sigrid Berka a cé dl Consulat general a Milan. Spadinger á metü man süa cariera politica a Bucarest, olache al â lauré sciöche Attaché tl’ambasciata austriaca y daldô âl lauré tl Minister por i afars cun l’ester a Viena.
rc
