Atualità
Fin dl ann de scora: Messaje deboriada di trëi assessurs
Cun incö (12/06) se röia por la maiú pert di scolars dles scores altes y profescionales l’ann de scora, por i mituns dles scolines y por i scolars dles scores elementares y mesanes sará l’ultim de de scora ai 16/06. Por la fin dl ann de scora ti fej i assessurs Mussner, Achammer y Tommasini a düc i scolars y dötes les scolares les mius aodanzes por de beles vacanzes y döt le bun por i ejams finai.
Por les scores altes y profescionales él incö, vëndres ai 12 de jügn, l’ultim de de scora, por les scores elementares y mesanes se röia l’ann de scora 2014/15 la proscima edema, en dedolönesc ai 16 de jügn. Chësc ann é sté por la scora te Südtirol y tla Talian n ann de transiziun por ci che reverda la reforma scolastica nöia che vëgn laurada fora dötaurela. N ann te chël che la scora dl Südtirol á confermé süa colaboraziun strënta cun le monn dl’economia, por merit ince di proiec y dles acordanzes cun les categories interessades. Le cheder dla scora tl Südtirol presentëia dötadöm n numer de 91.000 studënc partis sö danter les trëi Intendënzes scolastiches.
„Chësc ann de scora é sté dër rich de scomenciadies y proiec, olache al é gnü valorisé le lian danter la scora y le monn dl laur, le plurilinguism y la cosciënza storica di scolars y dles scolares. Insciö él gnü metü da jí tles scores te döt Südtirol proiec por recordé le centenar dla Pröma Vera y por che i mituns pois aprofondí chësta tematica storica dla vera por mët la basa por n dagní de svilup y pesc te nüsc raiuns“, á recordé l’assessur por la scora ladina Florian Mussner.
Ince por l’assessur Christian Tommasini „él sté n ann impegnatif, tratan chël che al é sté poscibl da stlü jö na seria de proiec por l’aprendimënt di lingac te düc i liví scolastics. Le plurilingusim romagn n pilaster fondamental de nosta scora y dess gní integré deplü tl insegnamënt cun proiec y sperimentaziuns“, insciö Tommasini. L’assessur por la scora taliana á ince sotligné l’importanza da na maiú colaboraziun danter le monn dla scora y dl laur, por ejëmpl tres n aumënt di practicums y dles ores te laboratore.
L’assessur por la scora todëscia Philipp Achammer á recordé en gaujiun dla fin dl ann de scora che chësc ann él por le pröm iade ince poscibl por studënc dles scores profescionales da fá l’ejam de maduranza. „Chësc titul de stüde ne ti pita ai studënc insciö nia oportunités nöies tl monn dl laur, mo ince la poscibilité da jí inant cun i stüdi al’Université“, insciö Achammer che á ince recordé l’importanza dl sistem de formaziun profescional che pita n azes diret al monn dl laur y che le govern oress ince adaté tl'oferta de formaziun a livel nazional, insciö Achammer.
A düc chi che rovará chësta y la proscima edema l’ann de scora ti aoda i assessurs Mussner, Achammer y Tommasini de beles vacanzes da d’isté y a chi che al ti aspeta ciamó i ejams finai dla scora mesana, alta y profescionala döt le bun y tröp suzes.
rc
