Atualità
La recostruziun dl punt sön la strada danter Lijun y Rungg é jüda a piz
Ai 28 de ma dl 2015 é i laurs de recostruziun dl punt danter Lijun y Rungg tl Comun de Lijun al chilometer 13,60 dla strada provinziala 30 jüs a piz. Indöt á i laurs albü na dorada de n ann y á costé 917.757 euro.
La recostruziun dl punt é gnüda planificada dala Repartiziun Infrastrotöres cun l’intenziun da baraté fora la vedla costruziun danter Lijun y la fraziun de Rungg tl Comun de Lijun, che â desmostré n valgönes mancianzes strotorales dl punt, cun na costruziun nöia che é gnüda fata sö danü te presciapüch n ann. Le punt nü á na lunghëza de 13 metri y na larghëza de 11 metri cun dui coliamënc cun marciapisc che á proteziuns aposta por i peduns y che porta para ince vantaji tratan les operaziuns de manutenziun dla strada. Por podëi garantí na buna stabilité y na dorada lungia dl material ne él nia gnü lauré tratan l’invern, mo tratan l’aisciöda y d’isté cun temperatöres plü adatades por la metüda dl asfalt sön la strada dl punt. Tratan les operaziuns d'escavaziun él ince sté poscibl da mët sot tera ite la linea bele esistënta dl telefon.
Le cost complessif dl intervënt (cosć por por l’espropriaziun dles arees nezesciares, spostamënt dles infrastrotöres, planificaziun, yii.) é sté de 917.757,72 €. Le diretur dla Repartiziun Infrastrotöres, Gustav Mischì, le responsabl dl intervënt Stefano Mazzone y le diretur di laurs Massimo Padoan se dij contënc por le completamënt dl punt, cun chël che al sará poscibl da mioré la viabilité y la segurëza dl trafich tl Comun de Lijun. I laurs de costruziun dl punt, bele davert al trafich, é gnüs fac dal’impreja Gregorbau Srl de Fié (Scilier).
rc
Galaria dales fotografies
