Atualità
Bilanz 2016: la Junta incunta les organisaziuns soziales y economiches
N bilanz plü o manco anfat a chël dl ann passé y na soma dles entrades cun n pice aumënt sciöche segnal de n mioramënt dla situaziun economica. Chësc é le cheder por ci che reverda le bilanz de previjiun 2016 debatü inier (23 de jügn) tratan n’incuntada danter le presidënt Kompatscher, döta la Junta provinziala y i rapresentanc dles organisaziun soziales y economiches.
Partezipaziun: chësta é la parora tlé dla strategia chirida fora dala Junta provinziala por scomencé le gran laur de elaboraziun dl bilanz de previjiun 2016 - n percurs che á metü man cun na seria de incuntades cun les organisaziuns soziales y economiches y che rovará a na proposta de lege che gnará ciamó reejaminada y debatüda cun i rapresentanc dles categories economiches y cun i sindacac. Öna de chëstes incuntades de preparaziun é gnüda a s’l dé inier da sëra (ai 23 de jügn) tla curt interna dl Palaz Widmann, é le cheder che é gnü fora é en general positif. „I pröms segnai positifs de na chersciüda economica a livel nazional y europeich – insciö le presidënt Arno Kompatscher – se fajará ince sintí te Südtirol: le resultat sará n bilanz plü o manco anfat cun chël dl ann passé, mo cun na soma dles entrades che ará na picera chersciüda.“
Öna dles tematiches portades dant tratan la sentada é stada chëra di gragn vari fac dala Junta cun la reduziun dla presciun fiscala sön les families y les imprejes por ci che reverda les cutes de competënza locala sciöche la CCI (IMI), l’IRAP y l’ajunta dl IRPEF. „I ún metü ite reduziuns fiscales por na soma totala de 210 miliuns de euro – á recordé le presidënt Kompatscher – cun plü de 125 miliuns de euro a bëgn dl monn economich. Tan inant che al sará poscibl jarán inant sön chësc tru, por ejëmpl ince cun l’ampliamënt dla No-Tax-area sön l’ajunta dl IRPEF. I messun indere ince ponsé ai cosć che la man publica mëss sostigní, n valgügn de chisc é ince tl crësce, mo che al foss damí da conscidré sciöche investimënc: por ejëmpl ti seturs dla sanité, dles politiches soziales y dla formaziun.“
Les respostes da pert dles organisaziuns soziales presëntes al’incuntada de Palaz Widmann é stades positives, dantadöt por ci che reverda les scomenciadies bele metüdes man y preodüdes tl setur dles reduziuns fiscales. Le presidënt dl Wirtschaftsring, Philipp Moser, á laldé le „segnal positif de confidënza mené inant dala politica che s’á desmostré desponibla a ascuté sö les ghiranzes dl monn economich“. Moser á dit inant de ester a öna cun n ampliamënt de na No Tax Area sön l’IRPEF. N’idea che é ince gnüda sostignida dai sindacac, sciöche le portausc dla CGIL/AGB Alfred Ebner á recordé ti damanan ince ala Junta provinziala da „tigní cunt di cambiamënc dles condiziuns soziales y da aumenté le sostëgn ales families.“ Les organisaziuns economiches y soziales ará sëgn döes edemes de tëmp por ti presenté sües propostes ala Junta che tolará spo en conscidraziun les propostes tratan l’elaboraziun dl dessëgn de lege sön le bilanz.
rc
Galaria dales fotografies
Foto USP/ohn
