Atualità
L numer nuef de ëresFrauenInfoDonne ie da garat
La majera presënza dl’ëiles ti cunsëies y tla jontes de chemun do l’ultima veles y l ideal de belëza feminila ie la tematiches prinzipeles de chësta edizion nueva dla plata de nfurmazion ëresFrauenInfoDonne, dat ora dala Cumiscion provinziela per la valivanza dla chances danter ëiles y ëi y dal Servisc Ëiles dla Provinzia.
I resultac dla veles aministratives 2015 ie che ti Cunsëies cumenei y tla Jontes cumeneles sëntel śën plu ëiles. L’amboltes resta 10 y cunfermea nsci l resultat dl 2010. N bilanz dla ultima veles vën presentà tl numer nuef de ëresFrauenInfoDonne.
Dl raport dl’ëiles cun si corp y l ideal de belëza spandù ora dai media vëniel rujenà te d’autri cuntribuc. Dantaldut Lorella Zanardo, autora dl documenter "Il corpo delle donne" y Raffaella Vanzetta, coordinadëura dl Servisc per i desturbs alimenteres Infes, afruntea la cuestion dla prescions de se tenì a ideai de magrëza esagereda, fates sun l’ëiles da pert dla sozietà y dai media.
L Equal Pay Day, medemo paiamënt per l medemo lëur, che vën tenì uni ann ai 17 d’auril, fova chëst iede dedicà ala tematica "Lëur nia paià tla familia". Truepes ie states la scumenciadives metudes a jì da 59 urganisazions per chësc dì. Una dla manifestazions plu mpurtantes dla edizion 2015 dl Equal Pay Day ie l prim „Ironman Contest“ (cuncors dl ël che paidelnea).
La cuverta dla plata de nfurmazion ie dedicheda al snowboarder Roland Fischnaller, che à venciù l prim cuncors de paidelné resservà ai ëi "Ironman Contest" dl Südtirol. Na maniera ironica per sensibilisé n cont dla tematica dl lëur nia paià te familia n ucajion dl Equal Pay Day 2015, medemo lëur medemo paiamënt, sun l "Lëur nia paià te familia".
L numer nuef de ëresFrauenInfoDonne ie online sun la plata web http://www.provincia.bz.it/pariopportunita/eres.asp ulache l ie puscibl damandé che n l giape mandà debant sciche abunamënt. L possa nce unì damandà pra l Servisc Ëiles, tla Streda Dante 11 a Bulsan, tel. 0471 6950, e-mail serviziodonna@provincia.bz.it
USP
