Atualità
Dala Junta: Üties da munt, colaboraziun dla Provinzia cun AVS-CAI
La Provinzia, le CAI y l’AVS vá inant adöm tla prozedöra de spartiziun dles conzesciuns por la gestiun dles 25 üties da munt de proprieté provinziala. Incö (30 de jügn) á la Junta aprové la convenziun che regolamentëia chësta colaboraziun y la surandada dla gestiun dles üties. L'acordanza nöia gnará sotescrita ai 2 de lugio dai presidënc de CAI y AVS y dal presidënt dla Provinzia a Balsan.
Dal 2011 é 25 üties de munt rovades te proprieté dla Provinzia. Por assegné les conzesciuns por la gestiun dles üties á la Provinzia scrit fora tl 2014 na prozedöra publica che ne á ciafé degügn interessá. La Junta á insciö tut la dezijiun da adoré n’atra strada tres na colaboraziun plü strënta cun l’Alpenverein Südtirol (AVS) y le Club Alpino Italiano Alto Adige (CAI) por elaboré adöm n documënt cun prescriziuns, conscidran ince les conescënzes tla materia dles döes organisaziuns. „Do plü tratatives cun l’AVS y le CAI súnse stá bugn da ciafé n’acordanza“, á spilghé le presidënt dla Provinzia Arno Kompatscher do la sentada dla Junta provinziala. La basa dla cooperaziun é n’acordanza danter la Provinzia, l’AVS y le CAI che é gnüda aprovada dala Junta é che gnará firmada dal presidënt dla Provinzia Arno Kompatscher y dai presidënc dl AVS, Georg Simeoni y dl CAI, Claudio Sartori
en jöbia ai 2 de lugio
dales 09.00
tl palaz provinzial 1.
L’acordanza prevëiga l’insediamënt de na comisciun partitetica, che é formada dai surantsanc dl CAI y dl AVS sciöche ince dai direturs di Ofizi Manutenziun frabiches y Geologia y proes de materiai. Chësta comisciun laurará fora na lista por l’assegnaziun publica dla gestiun dles üties. Implü ára la comisciun ince le compit da monitoré la gestiun dles üties y da svilupé na lista cun priorités de ressanamënt dles üties. „L’AVS y le CAI ará insciö na funziun de aconsiadus, sides por ci che reverda la gestiun co le ressanamënt dles üties“, insciö Kompatscher. Deache la soma che gnará tuta ite dai contrac d’afit ne curiará nia dötes les spëises messará la Junta planifiché na soma ajuntiva tl bilanz anual, insciö le presidënt dla Provinzia.
Por le sorvisc de consulënza ciafará le CAI y l AVS na soma de 40.000 euro che gnará spartis sö danter les döes assoziaziuns sön la basa dl numer dles üties en gestiun. „Chisc cosć messass la Provinzia paié te vigni caje, deache atramënter fajess chësc laur i colaboradus dl’Aministraziun publica“, á sotligné le presidënt Kompatscher. „Les üties da munt ademplësc a na funziun soziala y tradizionala dër importanta, ince deache ares vëgn anuzades dër tröp sides dai abitanc dl Südtirol co da nüsc ghesć“,á stlüt jö Kompatscher.
rc
