Atualità
Dala Junta: portina locala por dötes les informaziuns sön assistënza y cura
I familiars dles porsones che á debojëgn d’assistënza y cura podará tl dagní ciafé informaziuns, consulënza y aiüt sön le post da n su soget. La junta provinziala á aprové incö (ai 07 de lugio) i criters por la realisaziun de chisc sorvisc teritoriai che sará le referimënt por dötes les ofertes d’assistënza y cura desponibles.
Por mirit dla metüda tla rëi y dla colaboraziun strënta di sorvisc dl setur dl’assistënza y dla cura, ó la junta provinziala mioré le sostëgn por les families te de ries situaziuns, sciöche ince alisiré y ascorté le percurs por l’oferta de sorvisc plü adatada.Mëte sö i sorvisc teritoriai por les ofertes d’assistënza y cura, fat fora cuntra la fin dl 2014, vëgn conscidré le liam danter l’Aziënda sanitara provinziala, i Sorvisc soziai y les ciases de palsa. Cun la deliberaziun aprovada incö á la junta provinziala fissé i criters por atué i sorvisc teritoriai ti 20 raiuns dl Südtirol: "Na sort de portina tl raiun, n gran proiet por pité n su soget sciöche referimënt ai zitadins", á dit le presidënt dla Provinzia Arno Kompatscher.
Chisc sorvisc é por les porsones che á debojëgn de cura y assistënza, sü familiars y les porsones de referimënt dl’assistënza. Chëstes porsones ciafará dötes les informaziuns sön les ofertes desponibles dl setur sozial y sanitar y l’aiüt che vá debojëgn da scrí fora les domandes.
Implü fajará le sorvisc teritorial trasversal na pröma sciazada y na valutaziun dla situaziun, por mëte a jí les mosöres de prescia y chëres de sostëgn por n tëmp lunch y mesan. Danter les diretives por la fasa d’atuaziun él tresfora n laur de rëi por mëte sö le sorvisc d’informaziun y intermediaziun sön le post, na colaboraziun strënta danter i ënc che fornesc le sorvisc y l’aiüt da pert de n operadú profescional inciarié aposta.
Da organisé le sorvisc trasversal ti raiuns dl Südtirol gnarál metü adöm i colaboradus che á lauré cina sëgn te ciamps desvalis dla consulënza y dl sostëgn di familiars.
Bele da mëisc vëgnel baié por realisé concretamënter i sorvisc teritoriai. Por la fin dl 2015 gnarál stlüt jö n’ativité de informaziun, consulënza y valutaziun dla situaziun individuala dles porsones interessades. I sorvisc sön le teritore messará spo tó sö ince, al plü tert cina le 2017, l’acompagnamënt tresfora di caji de cura y assistënza.
usp
