Atualità
Frunc, confins y mic: Mostra tl Museum Ladin dai 17 de messé inant
„1914-1918. Al de là da vigni confin. I ladins i conta sua storia“ á inom la mostra speziala che vëgn daurida en vëndres, ai 17 de messé tl Museum Ladin a San Martin de Tor dal assessur provinzial Florian Mussner.
La pröma vera mondiala y le confin, dantadöt por ci che reverda les valades ladines incër le Sella ia, vëgn ejaminá pro la mostra speziala nöia tl Museum Ladin Ciastel de Tor a San Martin de Tor. Implü se dá jö la mostra cun le tema dl frunt, che passâ fora por les valades ladines y les despartî, fajô sciampé dalunc profugs y prijoniers, sfenô la comunité y mudâ dassënn le raiun. Y döt chësc ma n valgügn agn do che les Dolomites s‘â daurí al monn cun strades nöies y la ferata y che al rovâ bele adalerch schires de turisc- alpinisc, che â porté adalerch n pü' de bëgnester. Mo dl 1914 êra spo finida.
La mostra „1914-1918. Al de là da vigni confin. I ladins i conta sua storia" vëgn daurida ai 17 de messé dales 18:00 tl Museum Ladin a San Martin de Tor. Dala daurida él l'assessur provinzial Florian Mussner, la direturia dla Repartiziun provinziala Museums, Karin Dalla Torre y Stefan Planker, le diretur dl Museum Ladin, sciöche ince la storica Luciana Palla, che á surantut la inrescida scientifica dla mostra.
I rapresentanc di media é dër bel inviá
a tó pert ala daurida dla mostra
en vëndres, ai 17 de messé dl 2015, dales 18:00
tl Museum Ladin, Ciastel de Tor,
Strada Tor 65, a San Martin de Tor
y da nen baié.
SAN
