Atualità
Istitut Culturel Ladin "Micurà de Rü": Cunsëi d'istitut nuef
L Cunsëi d'istitut dl Istitut Ladin "Micurà de Rü" - metù adum da sies persones - ie unit istituì da nuef ncuei, ai 14 de lugio, dala Jonta provinziela sun pruposta dl Assessëur ladin Florian Mussner. La prupostes ie unides fates dala lies cultureles de Gherdëina y dla Val Badia.
L Istitut Ladin "Micurà de Rü" cun sënta a San Martin de Tor à l duvier de se cruzië che l vënie mantenì y sustenì la cultura y rujeneda ladina. "L Istitut ie una dla trëi seves plu mpurtantes per la cunservazion dla rujeneda y cultura de nosta mendranza. L dà mpulsc mpurtanc per si svilup y devulghea danter i zitadins cunescënzes y nrescides nueves sun nosta cultura", sotrissea l Assessëur ladin Mussner. L Istitut culturel ie oradechël na luegia de dialogh cun d'autra mendranzes linguistiches. A chësta moda vën l savëi n cont dla cultura ladina publicà nce sëura i cunfins dla valedes ladines ora", nsci l Assessëur Mussner. "De mpurtanza ie la culaborazion cun d'autra istituzions cultureles y lueges de furmazion, dantaldut canche la va de scumenciadives plu amples", sotrissea l Assessëur. A dì de ël ie l Istitut Ladin per la Jonta provinziela la istituzion de referimënt te duta la dumandes ulache la va de cultura y rujeneda ladina.
Sun ghiranza dl Assessëur Mussner à la Jonta provinziela ncuei numinà l cunsëi nuef dl "Istitut Micurà de Rü". Tl cunsëi nuef ie Albert Videsott, sciche reprejentant dla Jonta provinziela. L reprejentant dla lies cultureles de Gherdëina ie Bruno Senoner. La lies cultureles dla Val Badia ie reprejentedes da Erica Castlunger. L reprejentant di chemuns dla Val Badia ie oradechël Giorgio Costabiei. L sistem de furmazion ladin vën reprejentà tl cunsëi da Maria Kostner. Nce l Ntendënt dla scoles dla valedes ladines Roland Verra fej pert de chësc gremium.
usp
