Atualità
Dala Junta: Stabilis i proscims vari dla reforma dla sanité
La reorganisaziun dla strotöra d’aministraziun dl’Aziënda sanitara provinziala é öna dles priorités prinzipales dla reforma sanitara preodüda dal plann de ajornamënt dl’assistënza sanitara Südtirol 2020. Incö (28/07) á la Junta provinziala definí i proscims vari y le calënder por la redefiniziun dla lege provinziala 7/2001 y á insciö ponü la basa por reorganisaziun dl sistem sanitar dl Südtirol.
La lege provinziala 7/2001 (Ordinamënt nü dl sorvisc sanitar provinzial) stabilësc les competënzes y i compic dl’Aministraziun provinziala y dl’Aziënda sanitara. L’obietif dla lege é chël da ti garantí n’assistënza sanitara a döta la popolaziun dl Südtirol. La reforma sanitara planificada dala Junta prevëiga insciö l’ajornamënt dla lege 7/2001 por podëi organisé danü le setur sanitar tl Südtirol. L’assessuria Martha Stocker ti á presenté incö ai 28 de messé ala Junta provinziala i trëi seturs d’aziun prinzipai dla reforma: le pröm punt é la definiziun nöia y tlera di impëgns tl setur sanitar ti confrunc dla popolaziun, le secundo punt reverda le potenziamënt dla capazité d’intervënt dl sistem sanitar por merit de na definiziun tlera dles competënzes y dles responsabilités y sciöche terzo punt él gnü porté dant la creaziun de na strotöra de direziun y de aministraziun plü scëmpla y plü asvelta.
„Al se trata sëgn da definí avisa la strotöra dl’Aziënda sanitara provinziala y la colaboraziun cun i partners sön le teritore por podëi ti assiguré ince tl dagní a döta la popolaziun dl Südtirol n’assistënza sanitara che funzionëia“, á sotligné l’assessuria por la sanité Stocker. Tres chësc percurs él dër important da despartí avisa i compic danter la Junta provinziala (definiziun dles linies politiches), la Repartiziun Sanité (strategies, planificaziun, control) y l’Aziënda sanitara (atuaziun operativa). L’assistënza sanitara messará gní sostignida tl dagní tres n renforzamënt dla rëi di ospedai y dl’assistënza sanitara sön le teritore, tres na cualité valia, la sostenibilité economica dles prestaziuns y la definiziun tlera di compic dles unités desvalies dl’assistënza.
Öna dles proscimes mosöres sará, aladô dla dezijiun tuta incö dala Junta, n’unificaziun dl’organisaziun di cater raiuns sanitars autonoms te na strotöra unica che dess aumenté l’anuzamënt dles sinergies di cater raiuns soziosanitars. La definiziun prezisa dles responsabilités y di compic, la reduziun de gerarchies y le smendrimënt dla burocrazia dess garantí inant n’organisaziun plü asvelta.
La Junta provinziala á implü aprové incö le calënder por la formulaziun nöia dla lege 7/2001: do la deliberaziun podarál sëgn gní scomencé cun la formulaziun de na proposta de lege nöia. Tl prozes de ajornamënt dla lege gnarál naturalmënter ince integré les perts soziales, i grups d’interes, i sindacac y les rapresentanzes politiches che podará porté dant sües propostes y integraziuns.
rc
