Atualità
Dala Junta: Conzesciun de aiüc por le pröm insediamënt de paurs jogn
Cun la deliberaziun aprovada incö (ai 28 de messé) á la Junta provinziala stabilí i criters por la conzesciun de aiüc a bëgn de paurs jogn che se tól sö por le pröm iade la responsabilité da manajé n’aziënda da paur, de proprieté o adinfit.
Sciöche „pröm insediamënt“ vëgnel definí la conduziun, por le pröm iade, de n’aziënda da paur por na dorada minimala preodüda de 10 agn. Le paur ne pó nia avëi sura 40 agn y l’aziënda agrara, de proprieté o adinfit, mëss ester n mesc stlüt. L’aiüt da pert dla Provinzia á le fin da sostigní l’inserimënt di jogn tl monn dl laur da paur y da garantí insciö n barat de generaziuns. „Al ne se trata nia de n contribut nü o implü, mo de na surantuta dles spëises da pert dla Provinzia“, á splighé le presidënt dla Provinzia Arno Kompatscher incö tratan la conferënza stampa do la sentada dla Junta provinziala.
Chësc contribut provinzial é nezesciar propi deache les pices aziëndes da paur ti raiuns da munt ne arjunj nia le limit plü bas di valurs dla produziun standard scric dant dal’Uniun Europeica. L’Uniun Europeica prevëiga insciö n contribut de almanco 10.000 euro por la surantuta de n’aziënda da paur. Chësta soma vëgn calcolada aladô dla spersa dl’aziënda y dla cuantité di tiers. Aladô de chësta calcolaziun europeica tomassel demez tl Südtirol söporjö 2.000 aziëndes da paur che ne podess nia damané do n contribut finanziar. Avisa chëstes aziëndes, insciö le diretur dla repartiziun competënta Martin Pazeller, arata la Junta dër importantes y ares dess gní sostignides. Cun i criters nüs dessel insciö gní smendrí le contribut finanziar dla Provinzia cina a 3.500 euro cun n tët mascimal de 10.000 euro. Insciö gnissel ince curí la locia che le sistem de finanziamënt dl’UE lascia. N finanziamënt pó ma gní damané da paurs cun n mesc stlüt.
I paurs jogn che ó s’anuzé dl contribut mëss danterater presenté n plann aziendal (cun i vari plü importanc y i obietifs dl svilup dl’ativité dl’aziënda da paur). Tl caje de na cumpra dla proprieté é le contribut de basa por le pröm insediamënt de 15 mile euro y pó arjunje cina al mascimo 33mile euro aladô dles condiziuns de svantaje dl’aziënda. Por ci che reverda i afic vëgn i contribuc conzedüs avisa cun mesa la soma preodüda pro les cumpres. I criters por i aiüc ai paurs jogn ti vëgn sëgn mená inant ala Comisciun dl’UE por la notificaziun che vá debojëgn.
rc
