Atualità
Dala Junta: dui miliuns implü por asfalté les strades comunales
Por sostigní i Comuns pro i laurs da asfalté á la Junta provinziala aprové incö (28 de messé) te süa sentada edemala 2 miliuns de euro sciöche mesi finanziars ajuntifs por intervënc de prescia por asfalté trates danajades dles strades comunales.
![](/news/img/lazy.gif)
Te döt le raiun provinzial él indöt 600 chilometri de strades comunales che á debojëgn de intervënc de prescia por gní ressanades. Deache les aministraziuns comunales ne á nia i mesi finanziars por sostigní chëstes spëises ajuntives che ne é nia inserides tla manutenziun ordinara, á la Junta provinziala tut la dezijiun incö, mertesc ai 28 de messé, da mët a desposiziun 2 miliuns de euro dal fonds de resserva. „Chësta soma ajuntiva é n’integraziun che vá lapró al program anual bele aprové y por chël che i un bele aumenté la soma en confrunt al ann passé cun 10 miliuns implü“, á prezisé le presidënt Kompatscher.
„Por ti dé na man implü ai Comuns gnará döta la pert che reverda i apalc, la proietaziun y l’esecuziun di laurs manajada dal Sorvisc strades dla Provinzia, ince por podëi jí inant cui laurs te na manira asvelta“, ajuntëia l’assessur por i ënc locai Arnold Schuler. La Junta provinziala á implü stabilí da lauré sön le plann de plü agn di laurs, che vëgn fac man man aladô de na gradatöra de priorités, por podëi rové cun i laurs da asfalté i 600 chilometri de strades comunales ti proscims sis agn.
rc