Atualità
Dala Junta: 300mile euro por daidé i dependënc dal jüch
La Junta provinziala á tut incö (ai 28 de messé) la dezijiun da ti assegné al’Aziënda sanitara la soma de 300mile euro da investí por ativités de informaziun, prevenziun, sensibilisaziun y scombatimënt cuntra la dependënza dal jüch.
La Provinzia de Balsan ciafa vigni ann dal Stat talian le 1,5 porcënt dl davagn che vëgn trat ite cun les cutes pro i automać ti salfs dal jüch. Chësta soma vëgn investida te programs de prevenziun y reabilitaziun por daidé i dependënc dal jüch. Le Minister competënt ne á indere nia ciamó paié fora chësc ann la soma che ti speta ala Provinzia y por garantí impó la continuaziun dl program por le 2015 á la Junta provinziala aprové incö, mertesc ai 28 de messé, n contribut de 300mile euro a bëgn dl’Aziënda sanitara che manajëia i sorvisc.„I fonds – á sotligné l’assessuria Martha Stocker – messará gní investis te ativités de terapia, d’informaziun, de sostëgn y de consulënza por i dependënc dal jüch y por sü familiars.“ Dal punt de odüda dl’organisaziun vëgn le program de prevenziun y informaziun coordiné da na rëi d’organisaziuns che tol ite i Sorvisc por les dependënzes sön le teritore, le zënter de terapia Bad Bachgart y le Forum prevenziun.
rc
