Atualità
Surandada dla palestra da arpizé a Bornech
Por düc i apascioná dl sport dl arpizé él gnü realisé a Bornech la palestra por l’arpize y le bouldering scolastich „K3“, na strotöra moderna y inovativa. Le frabicat nü é gnü surandé incö, vëndres ai 31 de messé ai gesturs.
Les ativités tl frabicat nü da Bornech gnará manajades dala seziun da Bornech dla Lia da Munt dl AVS Südtirol. La proposta por la gestiun dla palestra é gnüda aprovada dala Junta por i proscims diesc agn, dal 2016 al 2025. La surandada simbolica dles tles dla palestra nöia é gnüda tignida incö, vëndres ai 31 de messé, en presënza dl architët Andrea Sega, diretur dla Repartiziun Frabiché y Sorvisc tecnich dla Provinzia en rapresentanza dl assessur por le frabiché Christian Tommasini, dl architët Paolo Bellenzier dl Ofize tecnich Frabiché est, dl assessur por la scora todëscia Philipp Achammer, dl diretur dl raiun scolastich Markus Falkensteiner y dl ombolt da Bornech Roland Griessmair.
L’arpizé é deventé n sport tres plü pratiché ti ultims agn da dötes les generaziuns. Bele tl 2009 â la Provinzia scrit fora na bandida por n concurs de proietaziun a livel europeich por la realisaziun de na palestra por l’arpizé. La strotöra é gnüda realisada aladô dl proiet inovatif dl Stüde de architetöra de Helmut Stifter y de Angelika Bachmann, che á davagné le concurs de proietaziun cun passa 127 partezipanc. I cosć di laurs de costruziun (calcolan ince lapró i parëis por l’arpizé) é de 6,75 miliuns de euro. La coordinaziun di laurs é stada tles mans dla Repartiziun Frabiché y Sorvisc tecnich dla Provinzia.
La palestra da arpizé y dl bouldering K3 é da ciafé dlungia le Zënter dles scores altes da Bornech. La zona dl lot de costruziun ê de 7.600 metri cuadrac por na cubatöra de 16.222 metri cubic. Le frabicat é metü adöm da plü perts che se desfarenziëia sides por ci che reverda la profondité co l’altëza cun amesa ite na curt che ti dá na dimenjiun de lerch dër ampla al frabicat. La strotöra á na formaziun dër particolara che ne destorj indere nia le paesaje tles vijinanzes.
I apascioná dl arpizé podará anuzé na spersa complessiva de 2.500 metri cuadrac de parëis cun 270 percursc. La zona por i esperc dl arpizé tol ite 400 metri, la zona didatica á n’area resservada de atri 400 metri, por le bouldering él gnü preodü na spersa de indöt 430 metri. L’area dl arpizé al estern é de 200 metri cuadrac. Le punt plü alt de düc i parëis é de 17,4 metri d’altëza. Al’intern dl frabicat él da ciafé na galaria por i vijitadus (ca. 75 metri cuadrac), aldinfora él preodü na zona por vijitadus de 180 metri cuadrac. I posć por lascé l’auto é de indöt 140.
La palestra da arpizé y dl bouldering é daverta döt le de, sides por tlasses scolastiches co ince por ativités extrascolastiches tratan le tëmp lëde. La manifestaziun de inauguraziun dl frabicat é jüda a piz incö cun na demostraziun pratica de tecniches desvalies dl arpizé da pert di mëmbri dla Lia da munt dl Südtirol.
rc
