Atualità
Presentades les diretives nöies sön la fecondaziun „eterologa“
L’assessuria provinziala por la sanité Martha Stocker á presenté incö ai 31 de messé tl contest de na conferënza stampa a Palaz Widmann les diretives nöies por la fecondaziun „eterologa“. Al á tut pert al’incuntada cun la stampa ince le primar dl repart de ginecologia dl ospedal da Bornech, Bruno Engl.
Cun la sentënza nr. 162 dl 2014 dla Curt costituzionala él gnü detlarada ilegitima la proibiziun da adoré tecniches de fecondaziun „eterologa“ y dal 15 de messé é les mosöres varëntes te döt le teritore dla Talia. Por podëi pité chësc sorvisc mëss les strotöres abilitades ademplí a na seria de indicaziuns y ales diretives dla lege 40 sön la fecondaziun artifiziala acompagnada che tol ite ince la tecnica „eteorologa“, chël ó di tres l’adoranza de donaziuns de somënzes y de zelules dl ü da pert de terzi.
La Junta provinziala é gnüda metüda a conescënza te süa sentada edemala de ai 28 de messé dles diretives nöies y á regolamenté les modalités d’azes por les strotöres provinziales che organisëia chësc sorvisc.
L’assessuria provinziala por la sanité Martha Stocker á sotligné tratan la conferënza stampa de presentaziun da incö ai 31 de messé le gran valur dl sorvisc dal punt de odüda dles tecniches sanitares y dl’etica, dantadöt por i pers che s’anuzëia dla fecondaziun artifiziala. „La sanité á na gran responsabilité tl vers di pers interessá che mëss gní informá abonora dles oportunités, di prighi y dles conseguënzes poscibles ince a livel iuridich dla fecondaziun acompagnada“, insciö l’assessuria Stocker che á ince recordé le documënt de posiziun dl Comitê etich provinzial sön chësta chestiun che pó gní consulté sot a: http://www.provincia.bz.it/sanita/comitati/prese-di-posizione.asp.
Le primar dl repart de ginecologia dl ospedal da Bornech, Bruno Engl, á ilustré le svilup sanitar sön la fecondaziun artifiziala dantadöt por ci che reverda le Südtirol. Te chësc contest á Engl sotligné che l’infecondité de n per é definida da la mancianza de conzeziun por la dorada de n ann. Chësc suzed, sciöche valur mesan tl 10 – 15 porcënt di caji.
„Atualmënter vëgnel curé tl Zënter de reproduziun dl repart de ginecologia dl ospedal da Bornech dai 1.000 ai 1.500 pers al’ann, de chisc él le 60 porcënt dal Südtirol, le 12 dal Trentin y le 38 porcënt dal rest dla Talia. La porzentuala de suzes é dl 25-26 %“, insciö le primar Engl. Sön la basa dla regolamentaziun nöia, che é jüda en forza ai 15 de messé, él poscibl da s’anuzé de dötes les metodes anuzades cina sëgn y implü dla fecondaziun acompagnada eterologa. Adoré chësc sorvisc po düc cun n’eté nia sura ai 42 agn y 364 dis. Le cost de vigni tratamënt sanitar é dai 1.500 ai 4.000 euro.
La presentaziun powerpoint dl primar Bruno Engl, adorada tratan la conferënza stampa, é gnüda injuntada.
rc
