Atualità
Smendrí le trasport de bëgns sön strada: incuntada di assessurs dl’Euregio
Istituzionalisé la colaboraziun che reverda le trasport de marcianzies tl’Euregio: chësta é la posiziun coletiva di assessurs dl’Euregio Florian Mussner (Südtirol), Ingrid Felipe (Tirol) y Mauro Gilmozzi (Trentin) do l’incuntada da incö (31/07) a Balsan. Cun i suranstanc dles Ciamenes de comerz di trëi raiuns á i assessurs debatü ince dl transiamënt proibí de seturs de marcianzies tl Tirol.
Öna dles mosöres prinzipales por amplié la mobilité sostenibla é le spostamënt dl trasport de marcianzies dala strada sön les scines: sön chësta esigënza é a öna i assessurs provinziai Florian Mussner y Mauro Gilmozzi (Trentin) y l’assessuria por la mobilité dl Tirol Ingrid Felipe che s’á incunté incö (31 de messé) tla sënta dl’Euregio por traté la tematica dl trasport de marcianzies tl raiun dl'Euregio Tirol, Südtirol y Trentin.
„Le trasport de marcianzies ne s’archita nia ai confins provinziai, por chësta rajun él nezesciar da individué cun les regiuns vijines y cun le monn dl’economia na seria de mosöres y strategies che pois ince gní adorades a livel nazional y europeich“, á dit l’assessur provinzial Florian Mussner. Propi chësta tematica dër complicada dl trasport de marcianzies se damana n dialogh costant danter dötes les perts interessades por podëi lauré te na manira strotorada y por ciafé le dërt ecuiliber danter les domandes y les limitaziuns, á ajunté l’assessur Gilmozzi, „y la scomenciadia dl Tirol dl transiamënt proibí de seturs de marcianzies é n pröm impuls te chësta direziun.“ I trëi assessurs á concordé da traté la chestiun te na forma istituzionala por ti dé na sbürla al spostamënt dl trasport de marcianzies dala strada ales scines y por aumenté la cualité dl’aria. Te cört tëmp jará chësta colaboraziun inant cun tratatives tecniches y politiches.
La vizepresidënta dl Tirol Ingrid Felipe á presenté i provedimënc stabilis dal Land Tirol por mioré la cualité dl’aria y che reverda le smendrimënt de emisciuns y le spostamënt dl trasport de marcianzies sön les ferates. Le Land Tirol planifichëia te chësc vers la reintroduziun dl transiamënt proibí sön autostrada de n valgügn seturs che dess porté a n smendrimënt de 200mile unités de TIR cun marcianzies. „Chësta proibiziun por n valgügn seturs de marcianzies y les mosöres ajuntives é n contribut important por la sconanza dla cualité dla vita y por le svilup de na politica europeica dla mobilité“, insciö Felipe.
Le program tirolej prevëiga te na pröma perioda da messé 2016 le transiamënt proibí sön l’A12, l’autostrada dl Inntal, de marcianzies che reverda i seturs dl refodam, material de peres y de tera, material d’escavaziun, taies, sugher y de mesi dl trasport. Da otober 2016 ne podarál nia plü passé sön l’autostrada mesi dl trasport cun marcianzies che reverda minerai, aciá (a pert armadöres y costruziuns), ermo, travertin y plates de ceramica. Sides i assessurs che i suranstanc dles Ciamenes de Comerz dl’economia – le presidënt dla Ciamena dl’economia dl Tirol Jürgen Bodenseer, le presidënt dla Ciamena de comerz dl Südtirol Michl Ebner y le vizepresidënt dla Ciamena de comerz de Trënt Luca Rigotti – se damanda dezijiuns asveltes da pert dl’Uniun Europeica por ci che reverda le trasport de marcianzies, dantadöt en previjiun dla costruziun dl tunel de basa dl BBT. I rapresentanc dl’economia se damana ince n’armonisaziun dles staziuns dles mosoraziuns dl’aria a Kufstein y Avio por avëi dac da podëi confronté. Implü se ghira i suranstanc economics n sostëgn finanziar por les imprejes de trasport che adora mesi de trasport che incuinëia püch y n mioramënt dl’autostrada sön les scines („RoLa“).
Retrac- http://we.tl/O7ZgP4CRa2
Intervista video assessur Mussner (ladin) http://we.tl/5HY6i12hvEIntervista video assessur Mussner - http://we.tl/T6ISvYlVPY
Intervista video assessur Gilmozzi - http://we.tl/6wB2QShwuv
Intervista video assessuria Felipe - http://we.tl/9ZONYwrdbN
File audio mp3
Assessur Mussner - http://we.tl/IzuozrDDWD
Assessur Gilmozzi - http://we.tl/tVQI1WqcSc
Assessuria Felipe - http://we.tl/pV57SGHnW4
rc
Galaria dales fotografies
