Atualità
Assistënza di mituns: L’ass.ria Deeg ti presentëia le conzet nü ales paures
L’assessuria por les families Waltraud Deeg á l’obietif da mioré le sistem d’assistënza dles mitans y di mituns cun n’eté dai nü mëisc ai trëi agn. Inier, en mertesc ai 4 de agost, ti él gnü presenté les diretives nöies al consëi provinzial dles paures dl Südtirol.
Bele da plü edemes é l’assessuria por les familes Waltraud Deeg sön le iade te döta la Provinzia por ti presenté ai grups d’interes les diretives nöies por n ampliamënt sides dla cualité co dla cuantité di sorvisc d’assistënza por i mituns y les mitans y por damané do propostes d’integraziun. Inier, mertesc ai 4 d’agost, él gnü a se le dé n’incuntada cun le consëi provinzial dles paures dl Südtirol a Porsenú, tratan chël che l’assessuria Deeg á splighé danterater ince l’importanza di pröms agn di mituns por n svilup sann. „Le focus de nosc conzet reverda insciö de plü mosöres che valorisëia l’aspet pedagogich, mo che reverda ince la cualité dles condiziuns de laur dl personal d’assistënza. I sorvisc d’assitënza dess insciö s’adaté ales esigënzes di mituns y dles families, dantadöt por armonisé le raport danter familia y laur“, insciö Deeg.
L’assessuria por les families á recordé che le conzet d’assistënza di mituns é ma öna dles mosöres y di trus por daidé y sostigní les families. N vare important te chësc vers foss por i geniturs che stá a ciasa cun i mituns da ti garantí l’assiguraziun por la ponsiun tratan i tëmps d’educaziun di mituns, mo chësta chestiun é de competënza statala. „Por le momënt podunse ma sostigní l’assiguraziun suplementara volontara por le tëmp che i geniturs stá a ciasa pro i mituns“, spliga l’assessuria Deeg.
Les diretives nöies prevëiga la creaziun de n zënter de competënza tl’Agenzia por la familia dla Provinzia che ess le compit da definí les diretives y i standarg de cualité. Por podëi garantí n’assistënza basada avisa sön l’eté di mituns él preodü na tle de spartiziun dl’assistënza cun la definiziun dl numer di mituns y dles educadësses por grup y eté. „ Por ne messëi nia baraté jö sovënz les educadesses gnarál lauré por n paiamënt y n’assiguraziun plü adatada ales competënzes. Le laur cun i mituns pici é de gran valur y al ne pó nia ester che al ne vëgnes nia paié aladô“, insciö l’assessuria por les families.
Por ci che reverda le numer di posć desponibli dessel gní garantí, aladô dl conzet, n numer minim garantí por vigni comun. Na diretiva dl’Uniun europeica scrí dant che al dess gní metü a desposiziun posć d’assistënza por almanco 33 porcënt di mituns danter i nü mëisc y i trëi agn. Tl Südtirol vëgnel garantí por le momënt posć por le 25 porcënt di pici mituns cina ai trëi agn.
„Öna de nostes ghiranzes é chëra che les umes ais la poscibilité da podëi chirí fora canche ara nen vá dles formes d’assistënza por sü mituns“, spliga la suranstanta dl consëi dles paures Hiltraud Neuhauser Erschbaumer. N sorvisc important vëgn pité de chësc vers dales umes dl de cun l’organisaziun che vëgn manajada dal consëi dles paures. „Da pert dla man publica mëssel gní garantí che les umes ais strotöres d’assistënza te sües vijinanzes, dantadöt ti raiuns da munt. Ince chësc é n valur important por le svilup di raiuns rurai“, é a öna l’assessuria y la suranstanta dles paures.
rc
