Atualità
Assistënza di mituns: l’assessuria Deeg incunta le Consëi di Comuns
Tl Consëi di Comuns á l’assessuria por les families Waltraud Deeg presenté l’edema da denant les diretives por l’orientamënt nü dl’assistënza di mituns te Südtirol. L’assessuria, che é gnüda acompagnada da öna dles ideadësses dl conzet Gertraud Battisti, á sotligné che „i Comuns é n partner important, n barat de idees é porchël fondamental“.
„I orun cherié les condiziuns de basa por che les families pois se svilupé te na manira otimala“, á sotligné l’assessuria tratan la presentaziun dl conzet nü dl’assistënza di mituns al Consëi di Comuns. „De importanza primara pro le svilup dl’assistënza é la cualité dl’oferta“, é l’assessuria y i rapresentanc dl Consëi di Comuns a öna. Ince sön atri punc, sciöche la nezescité de na tlé de spartiziun di mituns, les diretives por grups cun plü mituns, personal cun na buna formaziun profescionala y n bun aredamënt dles strotöres, é le consens sté gran. Por garantí da ne messëi nia baraté massa sovënz les educadësses él gnü fat les propostes da mët a desposiziun n paiamënt adaté y plü cursc de formaziun permanënta. „Ma insciö sarál poscibl da antergní a n barat costant dl personal d’assistënza“, á recordé l’assessuria Deeg.
Por ci che reverda i posć por i mituns dessel gní garantí n numer minim te vigni Comun aladô dles normatives europeiches che prevëiga na porzentuala de posć a desposiziun dl 33 porcënt de düc i mituns dai nü mëisc ai trëi agn. Atualmënter vëgnel curí le 25 porcënt di posć por pici mituns cina ai trëi agn te Südtirol. La proposta da adoré n conzet cun n numer minim de posć te düc i Comuns garantiss da smendrí les listes cun i tëmps de speta y da aumenté la sigurté de planificaziun por les families, insciö Deeg. „Y chiló él da inrescí avisa les nezescités y da lauré fora n conzet che se basëia sön les ghiranzes efetives di comuns. Ince l’obietif da mët a desposiziun strotöres adatades é n compit da planifiché adöm danter la Provinzia y i Comuns “, recorda l’assessuria.
Le proscim vare sará chël da analisé les formes de finanziamënt plü adatades al conzet. Les propostes gnará laurades fora da n grup de laur cun rapresentanc di Comuns y dla Provinzia.
rc
