Atualità
Dala Junta: colaboraziun cun l'ACI por recuperé i punc dla patent
Fá adinfora dl Safety Park n zënter de competënza nazionala sön le rovëne sigü: chësc é l’obietif dl’acordanza cheder danter la Provinzia de Balsan y l’„Automobile Club d’Italia“ (ACI) portada dant dal assessur por la mobilité Florian Mussner. La colaboraziun cun l’ACI prevëiga la realisaziun de cursc por recuperé i punc dla patent.
Le Safety Park rapresentëia bele sëgn n punt de referimënt zentral por le rovëne sigü tl Südtirol y chësc nia ma por la strotöra moderna cun pistes de proa por pici y gragn, mo ince por la gran varieté dles ofertes formatives por dötes les tipologies de auti y por vigni eté di partezipanc. La Junta provinziala á aprové incö ai 11 d'agost n’acordanza cheder cun l'ACI che prevëiga la planificaziun de cursc por recuperé i punc dla patent tl Safety Park. „Chësc rode d'educaziun stradala dess ciamó gní renforzé tres na colaboraziun strënta cun l’ACI – á sotligné incö l’assessur por la mobilité Florian Mussner – a na moda da fá adinfora dl Safety Park n zënter de competënza nazional, te chël che al é ince poscibl da tigní cursc por rovëne sigüsc y recuperé i punc dla patent.“
Do la reforma dl codesc dla strada tl 2010 él poscibl por düc i autisć a chi che al ti é gnü tut demez punc dla patent da nen recuperé al mascimo cinch tres la partezipaziun a n curs de rovëne sigü. I esperc dla Repartiziun Mobilité dla Provinzia, dl Safety Park y dl ACI laora atualmënter a na planificaziun tecnica di cursc por la recuperada di punc dla patent, por ti porté dant daldô na proposta al Minister di trasporc che tol spo na dezijiun definitiva sön l’integraziun dl Safety Park tl program nazional. „I cursc de rovëne sigü dl ACI se tëgn ai standarg de cualité plü alc a livel europeich y adöm cun le Safety Park sarál poscibl da mëte en pe chël mix danter pratica y teoria che podará avëi efec positifs sön la segurëza stradala dl Südtirol“, á dit l’assessur por la mobilité Florian Mussner. L’acordanza de colaboraziun danter la Provinzia de Balsan y l’ACI reverda ince d’atri seturs dla mobilité sostenibla, dl trasport de marcianzies y dl mioramënt dla segnaletica stradala.rc
