Atualità
Dolomites UNESCO LabFest ala fin d’agost
Te avisa döes edemes dai 28 ai 30 d’agost gnarál a se le dé la secunda ediziun dl Dolomites UNESCO LabFest a Auronzo de Cadore. Al se trata de n festival tematich cun tröpes ativités culturales y de aorela cörta, cun mostres, incuntades, workshop y percursc de gastronomia. La tematica zentrala dl festival sará i confins, storics y personai.
La pröma ediziun dl LabFest é gnüda tignida a La Val tla Val Badia l’ann passé. Chësc ann gnará la manifestaziun che tematisëia le conglomerat storich, sozial y cultural dles Dolomites organisada a Auronzo di Cadore, n paisc dla Provinzia dl Belun ai pisc dles Trëi Pizes de Lorëi. L’inauguraziun ofiziala é en program ai 28 d’agost dales 18.00 tl cinema Kursaal cun n program che jará spo inant por trëi dis cun tröpes scomenciadies desvalies. L’ediziun 2015 á l’inom de #SCONFINI y analisará les Dolomies sot ai aspec di conflic y dles desfarënzies mo ince sciöche raiun de barat cultural y d’incuntades. Les munts che dan da 100 agn ê raiun de vera y de combatimënc de violënza s’á trasformé cun le passé dl tëmp te n raiun patrimone dl umanité. Chësc svilup é n bëgn prezius che mëss gní studié y garantí inant. Les munts gnará ince analisades dal punt de odüda di limic dl’umanité y dla porsona, por capí tan inant che la porsona pó jí conscidran süa forza fisica, tëma y concentraziun.
Por ci che reverda i evënc plü interessanc por i vijitadus dl Südtirol él da cunté sö danterater la presentaziun di resultac dles incuntades #DOLOMITES2040, la sëra dedicada a Alexander Langer cun la presentaziun de n liber dediché al personaje südtirolej y le conzert dla musiga de Toblach dal inom „Melodies dal frunt“. Danter i apuntamënc plü interessanc dl LabFest él ince n’incuntada cun le alpinist y espert dl arpizé Maurizio Zanolla (Manolo) y cun la scrituria Nives Meroi.
Le program dl Dolomites UNESCO LabFest 2015 é da ciafé sön internet sot la misciun http://www.dolomitesunescolabfest.it/, sön la plataforma de Youtube pon indere bele odëi le video de promoziun dl proiet tlican ince chiló.
rc
