Atualità
Zertificaziun dl’esperiënza profescionala dles cures paliatives
Ti ultims agn é ince tl Südtirol aumenté l’importanza dla medejina paliativa, che reverda la cura, l’acompagnamënt y l’assistënza de paziënc gravemënter amará che ne respogn nia plü a tratamënc spezifics y che é te na fasa terminala. Incö á la Junta provinziala aprové na zertificaziun dl’esperiënza trienala dles cures paliatives por i doturs zënza na formaziun spezifica te chësc ciamp.
L’obietif dles cures paliatives é chël da arjunje la cualité de vita plü alta poscibla por i paziënc y por sües families. Le control dl dolur, di sintoms y de atri aspec psicologics, soziai y spirituai é de importanza fondamentala. Por podëi amplié y garantí na rëi de sostëgn publica y privata ampla él debojëgn da na seria de doturs spezialisá y de profescionisć spezifics, mo ince de doturs che laora te chësc setur zënza na formaziun spezifica.
Insciö á la Junta provinziala aprové incö al 1 de setëmber la zertificaziun dl’esperiënza trienala dles cures paliatives por i doturs zënza formaziun spezifica te chësc ciamp. I doturs che á n’esperiënza de almanco trëi agn stlüta jö alplü tert al 1 de jená dl 2014 tl setur dles cures paliatives pó fá domanda por na zertificaziun. Do la dezijiun dla Junta da incö sará l’ofize competënt dla Repartiziun Sanité che se fistidiará atira di proscims vari por ti consintí ai doturs interessá da presenté la domanda de reconoscimënt cina alplü tert ai 22 de jená dl 2017. L’assessuria Martha Stocker recorda te chësc contest che l’Aziënda sanitara provinziala é tl lauré fora dötaurela na rëi y n vademecum standard che reverda les cures paliatives por mituns, jogn y adulc.
rc
