Atualità
De dl’Autonomia, 2mile porsones por la porta daverta dla Provinzia
Ince sce le tëmp ne á nia daidé para á söporjö 2mile porsones tut pert al De dla porta daverta organisé dala Provinzia incö (5 de setëmber) a Balsan. La tematica zentrala dl de é stada la familia, cun la presentaziun de tröc sorvisc dl’aministraziun publica. Le presidënt dla Provinzia Kompatscher á splighé che „l’autonomia é n’oportunité mo ince na gran responsabilité.“
Ai 5 de setëmber dl ann 1946 á i ministri dl ester dla Talia, Alcide De Gasperi, y dl’Austria, Karl Gruber, firmé l’acordanza de Paris che é la fondamënta dl percurs che á porté le Südtirol ala situaziun atuala de autonomia. Por recordé chësc avenimënt, che pó gní definí sciöche na petra miliara dl’Autonomia, á l’Aministraziun provinziala organisé n De dla porta daverta cun de plü presentaziuns di sorvisc y ativités d’aorela cörta y d’informaziun por i zitadins. Indöt 2mile porsones á tut pert tratan le de ala manifestaziun cun vijites ai stang tla plaza Silvius Magnago y al’intern dla sënta dl presidënt dla Provinzia Arno Kompatscher y dl Consëi provinzial. Le De dl’Autonomia é gnü stlüt jö cun n discurs dl presidënt Kompatscher, che á sotligné che „l’acordanza de Paris, do les critiches tl mëteman, s’á desmostré na basa sön chëra che al é sté poscibl da costruí n dagní de avalianza y de convivënza pazifica.“
„Le percurs che nes á porté ala situaziun atuala tl Südtirol – insciö a splighé Kompatscher – é sté lunch, mo sëgn sun n’autonomia speziala che é garantida dala Costituziun y cun na proteziun internazionala tres l’acordanza firmada danter la Talia y l’Austria. L’autonomia é na gran oportunité mo ince na gran responsabilité che nes obliëia da costruí na sozieté valia, libera y de solidarieté, te chëra che nos düc ún les medemes poscibilités.“ Le presidënt dla Provinzia á spo fat n referimënt ala manifestaziun da incö recordan che „chisc resultac pó ma gní arjunj sce i laorun düc adöm: les sëntes che i ëis vijité incö ne é nia i palac dl podëi, mo les ciases de düc, olache i sun damaná da manajé le dagní le miú che ara vá.“ Ince le vizepresidënt dl Consëi Roberto Bizzo á recordé che „l’autonomia se definësc tres la partezipaziun di zitadins ales chestiuns publiches.“
Tla plaza Silvius Magnago s’ál presenté tratan le de de plü ofizi che se crüzia de sorvisc desvalis al’intern dl’aministraziun publica: dala Zentrala Viabilité al Meteo, dai Museums ales repartiziuns culturales, dai Stödafüch profescionisć ai sorvisc che se crüzia dl sport. Tratan le de él ince sté meso da incunté plü personalités dl sport, da vijité les sëntes dl Consëi provinzial y dl presidënt dla Provinzia. Ti dui palac provinziai, tla sënta dl Consëi y tl Palais Widmann, él ince gnü organisé vijites acompagnades y ativités d’informaziun che reverda i sorvisc che vëgn pitá dal’Agenzia por les families. La tematica zentrala tl Palaz provinzial 2 é stada la cultura cun la proieziun de plü films culturai. Plü retrac dl De dla porta daverta pón ciafé sön la plata facebook ofiziala dla Provinzia
rc
