Atualità
Tirol, Südtirol y Trentin fej festa ai 19 de setëmber a Dala/Hall tl Tirol
Sot le moto „Vire, gusté y sintí l’Euregio Tirol-Südtirol-Trentin“ gnarál tigní ai 19 de setëmber a Dala/Hall tl Tirol la gran festa dl’Euregio. La popolaziun dles trëi provinzies é inviada a tó pert ala scomenciadia.
En sabeda ai 19 de setëmber vëgnel metü da jí a Dala/Hall tl Tirol la festa dl’Euregio Tirol-Südtirol-Trentin. „Cun n program dër desvalí cun tröpes scomenciadies por pici y gragn orunse fesetjé adöm la colaboraziun danter les trëi Provinzies“: chësc é le messaje dl invit da pert di trëi presidënc Günther Platter (Land Tirol), Arno Kompatscher (Südtirol) y Ugo Rossi (Trentin) a düc i zitadins dles trëi Provinzies da tó pert ala festa. „Al gnará ince presenté n ressümé di proiec realisá y n plann dles sfidades che s’aspeta ti proscims agn“, insciö le presidënt Platter, che ti surandará en chësta ocajiun ince la presidënza al suranstant dl Trentin Rossi.
Tla plaza prinzipala dla cité gnarál istalé la paladina prinzipala cun la presentaziun de plü spezialités culinaries dles trëi regiuns. Dales 13.00 gnarál tigní la zerimonia ofiziala cun i trëi presidënc dles trëi regiuns. Implü sarál spo da ascuté sö i conzerc intratan le domisdé y da sëra cun danterater la band ladina dles Ganes y cun le conzert de Herbert Pixner. I mituns y les families podará se devertí tla ciasa dles manifestaziuns „Salzlager“ cun les lercs por depënje y pastelné, na tor da s’arpizé y n parcour por fá sport. Por l’ocajiun sarál ince poscibl da vijité le Museum dles monëdes storiches de Hall cun vijites acompagnades debann.
La pert sportiva gnará organisada tl stadium Haller Lend cun le torné dl palê dl’Euregio cun la partezipaziun dles cater mius scuadres amatoriales dl Tirol dl Nord, dl Ost, dl Südtirol y dl Trentin. Les partides de semifinala sará en sabeda, les finales por le terzo y le pröm post en domënia danmisdé.
Scomenciadia „green“: Cun la ferata speziala ala festa dl’Euregio
La festa dl’Euregio é gnüda tlassificada sciöche scomenciadia „green“. Dötes les porsones interessades pó insciö s’anuzé dla ferata Euregio speziala por jí debann cina Hall tl Tirol y indô derevers. La ferata pëia ia a Rorëi y s’archita pro vigni staziun dles ferates tl Südtirol.
Plü informaziuns sön la festa, les modalités d’iscriziun por jì cun la ferata y les scomenciadies pon ciafé sot a:
www.europaregion.info/sonderzug
www.europaregion.info/gewinnspiel
http://www.europaregion.info/it/festa-dell-euregio.asp
rc
