Atualità
Dala Junta: edema europeica cun le BBT, Bruxelles y l’Euregio
Chësta edema apëna metüda man sará por le presidënt dla Provinzia Arno Kompatscher na „edema europeica“: en mercui él insciö preodü la vijita a Balsan dl coordinadú dl TEN-T, Pat Cox, por traté le tunel de basa dl Prener, en vëndres sará le presidënt a Bruxelles por incunté le presidënt dla Comisciun europeica, Jean-Claude Juncker, y en sabeda él sön le program la festa dl’Euregio.
Le pröm di trëi termins é preodü por en mercui ai 16 de setëmber a Balsan olache al rovará adalerch le coordinadú dl TEN-T Pat Cox. „Tratan l’incuntada cun Pat Cox – á splighé le presidënt Kompatscher - nen jarará dla situaziun atuala di laurs por la costruziun dles galaries prinzipales dl BBT, mo ince dla planificaziun di intervënc che reverda les trates d’azes da nord a süd dl tunel.“ La tematica dl BBT se coliëia ince cun n’ater tema che vëgn conscidré na priorité dal presidënt Kompatscher y che é le renovamënt dla conzesciun dla A22. „Tla verjiun atuala dl’acordanza de renovamënt – á ajunté Kompatscher – él preodü n finanziamënt trasversal che röia lapró al fonds feroviar cun 550 miliuns de euro bele metüs da pert. Insciö gnarál metü a desposiziun por i proscims 30 agn vigni ann 30 miliuns implü por la costruziun dl tunel de basa dl Prener cun n investimënt che röia indöt un n miliard de euro.“
En vëndres jará le presidënt dla Provinzia a Bruxelles, olache al incuntará le presidënt dla Comisciun europeica, Jean-Claude Juncker. „Ince te chësta ocajiun nen jarará dl tunel de basa dl Prener, mo les tematiches zentrales sará la colaboraziun al intern dl’Euregio, l’istituziun dla macroregiun alpina y l’atuaziun dl plann Juncker che prevëiga novités dër importantes por le Südtirol“, á dit Kompatscher. Insciö ne messará na pert di proiec finanziá dala Uniun Europeica nia plü passé denant por Roma mo podará gní presentá diretamënter dales Regiuns, cun plü vantaji por proiec che prevëiga na colaboraziun cun les regiuns vijines sura i confins statai fora. Por en sabeda él indere sön l’agënda dl presidënt la festa dl’Euregio che vëgn organisada a Hall tl Tirol.
rc
