Atualità
Museum Ladin: Jita sön le Col de Lana (19 de setëmber)
N’escursciun dër interessanta por inrescí i posć storics dla Gran Vera vëgn metüda da jí en sabeda ai 19 de setëmber sön le Col de Lana. L’escursciun é organisada dal Museum Ladin Ciastel de Tor adöm al’assoziaziun Lia da Munt Ladinia.
Tl contest dla mostra temporanea „1914-1918. Al de là da vigni confin. I Ladins i conta sua storia“ vëgnel organisé dal Museum Ladin na jita sön le Col de Lana, un di posć de combatimënt tles Dolomites tratan la perioda dal Pröma Vera Mondiala. La partënza dala Val Badia en direziun Fodom é preodüda por en sabeda ai 19 de setëmber dales 06.30. Le program prevëiga n’escursciun al Col de Lana cun start da Fodom dales 08.00 en compagnia dl espert di lüsc storics dla Gran Vera Ezio Anzanello adöm ince ai alpinisć Roland Moling y Fortunato Flatscher. La dorada dla jita é da 3,5 a cater ores cun n deslivel de 960 metri da jí sö y 650 metri da jí jö.
La partezipaziun costa diesc euro (iade cun la coriera bele lapró). Al é nezesciar da se prenoté al numer dl Museum Ladin 0474 / 524020.
rc
