Atualità
Dala Junta: Safety Park, convenziun nöia cina le 2019
Cursc spezialisá por dötes les porsones che se möi sön strada y na sensibilisaziun costanta tl vers de na mobilité plü sostenibla - La Junta provinziala á aprové incö (ai 22 de setëmber) n’acordanza nöia cun le Safety Park che á valüta cina le 2019. „Aladô de chësta acordanza gnarál ma plü sostigní ativités de promoziun dla segurëza stradala“, insciö l’assessur Florian Mussner.
Les ativités organisades tl zënter de sigurté dl Safety Park é partides sö te trëi seturs che reverda le „Safety drive“, „Safety sports“ y „Safety events“. Por garantí l’atuaziun concreta de chësta spartiziun á la Junta provinziala aprové incö, mertesc ai 22 de setëmber, n’acordanza nöia danter la Provinzia dl Südtirol y le Safety Park. La Junta á implü tut la dezijiun da ti dé l’inciaria al assessur por la mobilité Florian Mussner da firmé l’acordanza. „Cun le program dl „Safety drive“ pita le zënter de Vadena na seria ampla de ativités formatives por mituns, adulc y organisaziuns por trasmët la segurëza stradala ince te na forma pratica“, insciö l’assessur Mussner. „Por nos él important da mët a desposiziun ofertes de formaziun por dötes les fasces d’eté y por dötes les porsones sön strada, por che na gran pert dla popolaziun pois s’anuzé dl’oferta dl Safety Park“, insciö l’assessur por la mobilité.
Insciö vëgnel metü a jí tl Safety Park ativités formatives por mituns, seniors y adulc, mo ince por organisaziuns y ënc locai, sciöche la polizia statala, i Carabinieri, i Stödafüch, la Crusc Blancia y Cöcena, l’Aiüt alpin y i Comuns. Implü él sön le program cursc por i motoziclisć y por chi che vá cun le scooter, ince en preparaziun al ejame dla patent o tl contest dla campagna de sensibilisaziun No Credit.
„Implü vëgnel lauré a n ampliamënt dla cooperaziun cun les istituziuns locales, danterater cun la Lia di paurs, l’assoziaziun economica dl LVH, l’Ökoistitut, le Club automobilistich ACI y l’agenzia dla BLS por adaté l’oferta dl Safety Park ciamó deplü ales esigënzes di consumadus“, insciö l’assessur Mussner. Por dötes les ativités tl setur dl „Safety drive“ á la Junta provinzila metü a desposiziun por le 2015 n contribut de 900.000 euro. Tl dagní dess i contribuc dala man publica ma plü gní adorá por proiec che reverda la segurëza stradala.
N ater pilaster dl Safety Park é la promoziun dles formes de mobilité sostenibla. „Te chësc setur jará la colaboraziun cun les scores inant, tl contest dla campagna de sensibilisaziun SOS Zebra. Implü él preodü de plü scomenciadies cun tl zënter la mobilité vërda“, insciö l’assessur por la mobilité. Al é ince planifiché la cumpra de gokarts y de motors eletrics por smendrí l’incuinamënt acustich y por sostigní l’ambiënt, ajuntëia Mussner. Les scomenciadies ti seturs dl „safety sports“ y dl „safety eventes“ messará se finanzié autonomamënter zënza contribuc publics. Te chisc seturs vëgnel ince tres monitoré che i standarg dl desturb acustich y dles emisciuns vëgnes respetá.
rc
