Atualità
Jus dles Dolomites: sostigní la mobilité alternativa
Le trafich sön i jus dles Dolomites é sté tl zënter de n’incuntada danter i assessurs Richard Theiner y Florian Mussner cun i ombolc dles valades ladines inier (21/09) a Balsan.
„Te chësta chestiun él important da ciafé na soluziun deboriada danter la Provinzies y i Comuns interessá. I ne podun nia sté chic, al vá debojëgn da ciafé na soluziun“, insciö á descrit inier (21 de setëmber) l’assessur por l’ambiënt Richard Theiner la situaziun atuala. Adöm cun la detlaraziun dles Dolomites a patrimone natural dl UNESCO él ince gnü lapró na seria de impëgns che mëss gní mantignis, insciö Theiner. Ciamó chësc ann él insciö nezesciar da ciafé na soluziun concreta.
Por arjunje chësc fin á les Repartiziuns Mobilité y Ambiënt, en colaboraziun cun la Junta provinziala dl Trentin, lauré fora na norma d’atuaziun dl articul 6 dl codesc stradal, che prevëiga, che les limitaziuns dl trafich ne pó nia ma plü gní stabilides aladô de gaujies de segurëza y de sanité, mo ince por rajiuns dla sconanza dl ambiënt. Por le momënt vëgn chësta mudaziun elaborada a Roma.
Por gaujies logistiches ne él nia poscibl da atué te cört tëmp n sistem cun n daz sön i jus. Ince na stlüta temporala dles strades por le trafich ne é nia na soluziun adatada. „Tl'area di jus dles Dolomites zirculëia söporjö indöt 1,2 miliuns de veicui al’ann. Nosc obietif ne é nia chël da evité la mobilité, mo plü co ater da mët adöm n sistem de mobilité sostenibla y de renforzamënt dl sorvisc dl trasport publich“, á sotligné l’assessur por la mobilité Florian Mussner. Na mosöra concreta é insciö l’introduziun de mesi eletrics y de corieres a idrogen. „Al é nosc obietif da lauré bele incö sön la soluziun che gniss sceno metüda en pratica indoman, chësc podess ince porté vantaji por la promoziun dl turism de döt le raiun dolomitich“, insciö Mussner.
N grup de laur, formé da rapresentanc dles Repartiziuns Mobilité y Ambiënt y dai ombolc dess lauré fora, adöm ai esperc dl setur, plü soluziuns concretes dla chestiun dl trafich sön i jus dles Dolomites.
rc
Galaria dales fotografies
Fotografia: USP/Pichler
