Atualità
Dala Junta: diretives nöies por les pices dejotes y chëres mesanes
Na prozedöra scemplificada y plü trasparënta, n percurs plü asvelt por implanc cun plü funziuns, finanziamënc ambientai por le pröm iade ince por derivaziuns idroeletriches mesanes: chëstes é les diretives tecniches nöies por les pices dejotes y chëres mesanes aproades incö (29 de setëmber) dala Junta provinziala sön proposta dl’assessur Theiner.
Cun la lege provinziala 2 dl jená 2015 él gnü emané les desposiziuns por les derivaziuns idroeletriches de dimenjiuns piceres y mesanes. L’articul dui stabilësc che i interessá mëss ciafé na lista y na descriziun di documënc nezesciars por les domandes do conzesciuns nöies o por renové conzesciuns scadüdes. Por chësc motif á l’Agenzia provinziala por l’ambiënt lauré fora ti mëisc passá, en colaboraziun cun l’Ordin di injeniers dla Provinzia de Balsan, diretives tecniches por les domandes do conzesciuns.
Sön proposta dl assessur por l’energia Richard Theiner á la Junta provinziala aprové chëstes diretives, „cun l’obietif da informé chi che fej domanda, i tecnics y i proietanc sön la documentaziun nezesciara por contribuí ala trasparënza y efiziënza dla prozedöra“, á sotligné l’assessur Theiner. Insciö sarál ince poscibl, aladô dl assessur por l’ambiënt, da smendrí le numer de intervënc de reparaziun y/o interogaziuns y coreziuns. „Implü sarál poscibl da aumenté la cualité dla proietaziun y i standarg de sigurté tres l’introduziun de n’analisa dl risch“, ajuntëia Theiner.
Dlungia na descriziun prezisa cun indicaziuns tleres dl percurs ti caji de conzesciuns nöies o dl renovamënt de chëres esistëntes prevëiga les diretives nöies n percurs plü asvelt por dejotes combinades, chël ó dí cun l’adoranza sides de ega da bëre co ince de implanc d’irigaziun y d’ineiamënt. „Les domandes é gnüdes planificades aladô de respostes standard y podará insciö gní tratades plü asvelt da pert di ofizi competënc“, á dit Theiner. L’adoranza energetica é resservada al anuzadú dla conzesciun dl ega da bëre. Por i implanc d’irigaziun é la conzesciun resservada al paur sce la produziun energetica é stabilida al intern dla conzesciun d’irigaziun.
Cun la lege dl 2015 él gnü preodü por le pröm iade ince fonds ambientai por dejotes mesanes ti caji de assegnaziuns nöies y dl renovamënt. Les diretives regolamentëia ince la strotoraziun de chisc fonds. „La soma é partida sö aladô de na cuota fissa y na cuota variabla“, á splighé l’assessur Theiner. La soma fissa vëgn stabilida aladô dl valur mesan dl prisc dl’energia dl ann denant y dles capazités dl implant, la soma variabla indere vëgn calcolada aladô dla produziun efetiva de energia y dl svilup dl prisc dl’energia. „Chësc ó dí: tan plü gran che l’implant, la produziun y le prisc dl’energia sará, tan plü fonds ambientai che messará gní paiá ai Comuns.“
Les diretives nöies porta insciö para na seria de vantaji por i Comuns y le Consëi di Comuns á bele dé süa aprovaziun. Danter les novités él ince da ciafé n’analisa dl risch tratan la perioda de proietaziun por garantí y mioré la sigurté di implanc. Tl caje dla costataziun de poscibilités de n risch ti gnarál damané ai proietanc la definiziun spezifica de mosöres de segurëza.
rc
