Atualità
Dala Junta: coriera danter Sanciana y Cadore, le sorvisc vá inant
Al jará inant almanco cina la fin dl ann le sorvisc de coliamënt dles corieres danter Sanciana y Santo Stefano di Cadore. La Junta provinziala á aprové incö (ai 29 de setëmber) sön proposta dl assessur por la mobilité Florian Mussner la prorogaziun dla convenziun cun la Provinzia de Belun che ára validité cina ai 12 de dezëmber.
Le coliamënt ê gnü planifiché avisa dan da n ann sciöche proiet de proa cun n’acordanza danter les provinzies de Balsan y Belun. Le coliamënt cun les corieres dl sorvisc publich ne ê insciö nia ma ponsé por ti jí adincuntra ales esigëntes di ghesć y dles porsones che vá sö por munt, mo ince por socodí les tröpes domandes da pert dl monn dl laur, en manira particolara da pert di pendolars che laora ti seturs dl comerz y dl turism. „Al se trata de n ampliamënt important dla rëi dl trasport publich sura i confins fora – á sotligné le presidënt dla Provinzia Arno Kompatscher – y n ejëmpl de na mobilité sostenibla te n raiun sensibl da munt.“ Tratan la perioda dl pröm ann d’ativité él gnü garantí indöt sis coliamënc al de tratan i dis de laur, trëi ê i iadi tratan i finsdledema y i dis de festa. Sön döta la trata da 43,2 chilomteri danter Sanciana y Cadora velél i prisc, les chertes, i abonamënc y les condiziuns dl sistem dl trasport publich dla Provinzia de Balsan: chël ó dí che al é poscibl da viajé ince cun le Südtirol Pass, l’Abo+ y la Mobilcard.
Tla convenziun danter i dui ënc locai él preodü che da incö (ai 29 de setëmber) cina ai 12 de dezëmber messará les corieres de linea fá indöt söporjö 23.500 chilometri, de chisc 42 porcënt tl’area dl Südtirol. Chësta divijiun vëgn ince mantignida por ci che reverda la spartiziun di cosć: la conzesciun dl sorvisc ti vëgn insciö surandada ala Provinzia de Belun, cun Balsan che garantësc la curida dl 42 porcënt dles spëises por na soma complessiva de 30.200 euro. Le coliamënt é le resultat de na scomenciadia dles Provinzies de Balsan, de Belun y dl Land Tirol al intern dl proiet Interreg „MM3R“ (Muoversi Meglio tra 3 Regioni) cofinanzié dal Fonds europeich por le svilup regional FESR. Aladô dl presidënt dla Provinzia Arno Kompatscher é chësta acordanza „n proiet important che dëida da contribuí ala formaziun de lians nüs danter les porsones, i lingac y i raiuns.“rc
