Atualità
Cooperaziun al svilup: Aprová nü proiec d’emergënza tl Nepal dl ost
L’ofize Afars de cabinet dla Presidënza á aprové indöt nü proiec d’emergënza tl Nepal, olache n tremoroz á fat de gran danns tl mëis de aurí de chësc ann. I proiec é gnüs presentá da organisaziuns no profit, le finanziamënt é de indöt 206mile euro.
I nü proiec ê gnüs presentá cina ai 18 de agost dl 2015 tl contest de na bandida de concurs scrita fora dal Ofize Afars de cabinet dla Repartiziun Presidënza dla Provinzia. Düc é gnüs aprová. Les organisaziuns y assoziaziuns che realisará i proiec é: Asia Onlus Balsan, Assoziaziun Pro Nepal, Ethical Project, Assoziaziun Amics Trentins Onlus, EcoHimal Südtirol-AltoAdige, Doturs dl Südtirol por le Monn, Assoziaziun Beppe y Rossana Mantovan, Ai.Bi. Assoziaziuns Amisc di Mituns, Aiüt ai Mituns dl Monn. Prësc dötes les assoziaziuns á bele lauré tl tëmp passé cun la Provinzia tl contest de proiec de colaboraziun al svilup y dötes á bele colaboraziuns atives cun istituziuns dl Nepal.
Les zones d’intervënt di proiec de prescia é situades tl area dl zënter-ost dl Nepal, la zona plü atocada dal tremoroz dl 25 de aurí dl 2015. En particolar é interessá i raiuns de Dhading, Gorkha, Kavrepalanchok, Ramechhap y Sindhupalchok.
La maiú pert di intervënc reverda la costruziun de abitaziuns provisores tres la cumpra de materiai de costruziun, dantadöt bandes de metal. Atri intervënc reverda indere le ressanamënt de frabicac privac y scores, le sostëgn psicologich dles vitimes dl tremoroz y la garanzia de n refornimënt de mangiaries. Dötadöm él gnü acordé n finanziamënt de 206mile euro.
rc
