Atualità
Presentazion dla stazion de Pruca restrutureda da nuef
Na lingia de lëures de modernisazion ie una fata ti ani passei pra la stazion de Pruca Laion. “Cun 12.000-13.000 ghesć ie la stazion deventeda n pont de transit de mpurtanza”, à dit l assessëur Florian Mussner ai 30 de setëmber n ucajion dla prejentazion di locai nueves.
“Cun si plataformes auzedes, i sotpassajes, la plazes da parché i auti, la fermedes dla curieres y la frabica dla stazion dertureda y cun bar curespuend la stazion de Pruca śën ai bujëns moderns dl trafich dla ferata local”, à sotrissà l assessëur per la mubiltà Mussner n ucajion dla festa de prejentazion di lëures de modernisazion.
“Dal 2012 a ncuei ie la cumpëida di passajires avaneda belau dl dopl”, à dit l presidënt dl cunsëi provinziel Thomas Widmann, che à nce lecurdà che che la stazion ie cunlieda bën tla rë dla mubiltà publica. “La stazions dla ferata ie for nce la chertes da vijita de nosc luesc”, à sotrissà Widmann.
“La stazion de Pruca-Laion ie n bon ejëmpl de coche l vedl y l nuef possa unì cunliei bën l un cun l auter” à dit Mussner. Da una pert iel elemënc tecnics moderns per n funzionamënt zënza problems dla ferata, dal’autra pert ie la sustanza storica dl scumenciamënt dl vintejim secul cun si fassada de porfir de quarz de Bulsan unida ressaneda a na maniera ejemplera y sensibla. “Nsci iesen stac boni de mantenì l carater speziel che ie tipich dla stazions dla linia dl Prëner”, nsci Mussner.
L ambolt Stefan Leiter à nce nunzià l problem dla puecia plazes dai auti pervia di truep penduleres.
Ti ani passei iel cun l sustëni dl gestëur dla ferates talian RFI, che fova reprejentà pra la festa tres Ivan Baroncioni, unit auzà y renuvà la plataformes y frabicà i sotpassajes.
La Provinzia à finanzià la gran pert di autri ntervënc pra la stazion. Nsci àn njinià ite lifc, fat plazes dai auti da tramedoi pertes dla stazion, frabicà mures de sustëni, fermedes dla curieres, n troi da jì a pe danter la stazion y la plazes dai auti, y nce na rundela. Cun l sustëni dla Repartizion provinziela Bëns culturei y dl Curatorium per bëns culturei tecnics àn pudù ressané la fassada, l tët y i vieresc dla frabica dla stazion.
Chisc ultimi lëures de ressanamënt che à custà ntëur n 530.000 euro ie unic dejëuc aldò de proiec de Jutta Winkler y cofinanziei per l 20 percënt dal chemun de Laion. Tlo leprò toca nce la derturazion dla sala d’aspieta, la restruturazion nterna di locai – de chisc ie un unit njinià ite coche bar – y l ressanamënt dla trëi uniteies abitatives tl partimënt suaut dla stazion.
L pluan Klaus Sottsas à benedì i locai modernisei dla stazion Pruca-Laion.USP
