Atualità
La campagna de sensibilisaziun cuntra les barieres architetoniches vá inant
En ocajiun dl otavo De nazional cuntra les barieres architetoniches che vëgn festejé incö ai 2 d’otober á l’Ofize provinzial porsones cun handicaps metü a jí n de dediche al moto „Manco barieres y plü cualité de vita“. De plü é stades les manifestaziuns organisades tles staziuns dles ferates en colaboraziun cun organisaziuns desvalies.
Tles staziuns dles ferates da Balsan, Maran, Porsenú, Bornech, Schlanders y Auer él gnü organisé incö (2 d’otober) en ocajiun dl otavo De nazional cuntra les barieres architetoniches plü aziuns de sensibiliaziun tl contest dl moto „Manco barieres y plü cualité de vita“. La campagna trienala de sensibilisaziun vëgn metüda a jí dal Ofize provinzial porsones cun handicaps en colaboraziun cun la Federaziun por le sozial y la sanité, l'assoziaziun Independent L., le KVW, le Zënter Verc „San Raffaele“ y l’Assoziaziun geniturs de mituns surc.
Tratan le de á plü volontars informé i passajiers y zitadins sön les problematiches che taca adöm cun les barieres architetoniches sotlignan dantadöt che l’eliminaziun de barieres architetoniches porta para n aumënt dla cualité de vita de na gran pert dla popolaziun, dai seniors, ales mames cun pici mituns cina ales porsones che á dificolté da se möi temporaneamënter.
Tles proscimes edemes gnarál ince taché sö tles staziuns dles ferates y sön les corieres dl sorvisc publich placac de sensibilisaziun cuntra les barieres architetoniches. Les scomenciadies che gnará organisades plü inant, tres tl contest dla campagna trienala, gnará publicades sön la plata internet dla Repartiziun politiches soziales sot a: http://www.provincia.bz.it/politiche-sociali/default.asp
rc
Galaria dales fotografies
Foto: USP - Maria Pichler
