Atualità
Dala Junta: alisiraziuns combinades, mosöres por aziëndes tla White List
Por ti consintí ales imprejes na miú adoranza dles alisiraziuns statales y de chëres provinziales tl ciamp economich á la Junta provinziala aprové incö (06/10) la cumulabilité de n valgönes de chëstes alisiraziuns. La Junta provinziala á implü adoté na scemplificaziun dles prozedöres por les imprejes inserides tla White List dl Minister.
De plü decrec statai emaná danter le 2012 y le 2014 prevëiga por les imprejes alisiraziuns fiscales te caji spezifics: por ejëmpl pro l’assunziun de personal spezialisé, por investimënc ti seturs dl’inrescida y dl svilup y por intervënc tl setur dl turism. N decret prevëiga implü finanziamënc alisirá ales PMI por la cumpra de mascins nöies (tlamé „Nuova Sabatini“).
Por consintí na miú adoranza dles alisiraziuns a livel statal conscidran ince la compatibilité cun le marcé intern á la Junta provinziala definí incö (ai 6 d'otober) la poscibilité da cumulé chisc imprësc de cutes cun les alisiraziuns tl ciamp economich preodüdes dala Provinzia tres les Repartiziuns Economia y Inovaziun, archirida y université. „Al se trata de na dezijiun che te chësta situaziun atuala dess ti dé ciamó na sbürla implü al’economia“, á dit le presidënt dla Provinzia Arno Kompatscher. Al ne pó nia gní combinades les alisiraziuns tl setur economich cun i contribuc aprová aladô dla lege provinziala sön le sparagn energetich y sön l’energia renovabla.
La Junta provinziala á implü aprové na scemplificaziun importanta a bëgn dles imprejes inserides tla White List dl Minister dl Intern: ti caji dla conzesciun de contribuc o de finanziamënc dal fonds de rotaziun ne tolará la Junta provinziala degöna prozedöra ajuntiva de control dl’informaziun antimafia pro dötes chëres aziëndes che é bele inserides tla White List. La White List dl Minister dl Intern é na lista de aziëndes (che pita sorvisc, laurs y atres prestaziuns) che ne é nia a prigo de n’infiltraziun mafiosa.
rc
