Atualità
Dala Junta: Aprové le dessëgn de lege sön i apalc publics
La Junta provinziala á aprové incö (ai 13/10) le dessëgn de lege che contëgn les „Desposiziuns nöies sön i apalc publics“. La Provinzia de Balsan sará insciö la pröma regiun taliana che rezepësc les diretives nöies dla Uniun Europeica sön la tematica di apalc. Le ddl nü porta para na seria de scemplificaziuns burocratiches cun de plü impulsc por les impreses locales.
Cun le dessëgn de lege nü presenté dal presidënt dla Provinzia Arno Kompatscher ará la Provinzia de Balsan a desposiziun na normativa plü tlera, unitara y scëmpla che reverda la tematica di apalc publics. Le Südtirol sará ince la pröma regiun taliana, y öna dles prömes a livel europeich, a aprové na lege sön chësta tematica cun na funziun de governance sön dötes les staziuns che se crüzia de apalc publics presëntes sön le teritore.
Le dessëgn de lege, cun indöt 60 articui, é gnü aprové incö, mertesc ai 13 d’otober, dala Junta provinziala do n percurs de partezipaziun (cun plü de 70 incuntades) di grups d’interes y dles Universités de Trënt y Desproch, tolon ince en conscidraziun na seria de osservaziuns presentades dal Consëi di Comuns. Le presidënt Kompatscher á presenté insciö i obietifs dla lege nöia: „Adoré le miú che ara vá les poscibilités de atuaziun che les diretives europeiches nes lascia por valorisé i criters dla cualité y le tru plü pice di vari tratan la produziun.“
Tla proposta de lege nöia vëgnel rezepí dötes les diretives europeiches dl 2014 y inserí na seria de scemplificaziuns burocratiches cun le fin da mëte a jí prozedöres plü asveltes y cun na maiú segurëza iuridica. Al é ince gnü inserí tl ddl nü n valgügn punc prinzipai dles diretives europeiches, danter chisc le prinzip de n’atenziun particolara tl vers di aspec ecologics y soziai. N ater punt zentral dl’aziun legislativa reverda n azes alisiré ales prozedöres tl setur di apalc por les piceres impreses locales y chëres mesanes. Por sostigní le percurs economich local y por renforzé la competitivité dles impreses piceres y mesanes ti gnarál dé plü pëis ai criters de cualité y ales produziuns locales. Al gnará ince inserí n’analisa di cosć che gnará coliada al percurs de realisaziun dl produt, tignin cunt dla „produziun a zero chilometri“.
Tl setur dles costruziun dles operes publiches él preodü danterater la despartiziun di apalc te de plü loc. Implü él gnü aumenté da un a dui miliuns de euro le tët cina chël che al é poscibl da organisé prozedöres scemplificades dles gares a invic. Pro i apalc che reverda les fornidöres cun n import cina a 207.000 euro podará la proietaziun gní efetuada te ma un n livel cun la chirida de n afitadú danter n grup de candidac zënza messëi scrí fora na gara a livel europeich. Al é ince preodü prozedöres ad hoc tl setur di sorvisc ales porsones, cun alisiraziuns por les impreses no profit, te na manira particolara por les cooperatives soziales. N valgönes gares podess insciö gní scrites fora ma por organisaziuns che laora zënza fins de davagn, por n’assegnaziun direta di sorvisc.
Le dessëgn de lege aprové dala Junta gnará sëgn ejaminé dala Comisciun legislativa por rové daldô ala votaziun finala tl plenum dl Consëi provinzial.
rc
