Atualità
Dla Junta: reabilitaziun, confermada la convenziun cun Bad Häring
Ince tl dagní ará i paziënc dl Südtirol che mëss fá cures de reabilitaziun do amputaziuns, ictus y de plü traumesc la poscibilité da fá la reabilitaziun tl zënter tirolej de Bad Häring. La Junta provinziala á tut la dezijiun da arlungé cina la fin dl 2018 la convenziun cun le zënter spezialisé tl’Austria.
Dal scomenciamënt di agn otanta vá na pert di paziënc dl Südtirol, che mëss se sotmëte a n tratamënt de reabilitaziun regolara porvia de n’amputaziun o na paraplegia, tl zënter convenzioné de Bad Häring tl Tirol, la strotöra che fej pert dla “Allgemeine Unfallversicherungsanstalt (AUVA)”, l’istitut d’assiguraziun cuntra i inzidënc che é da agn le zënter plü important tl’Austria por la reabilitaziun do inzidënc, traumesc, ictus y por le tratamënt de maraties neurologiches. La convenziun da sëgn danter la Provinzia de Balsan y la AUVA toma ala fin dl 2015.
Por ti conzede ai paziënc dl Südtirol da fá ince tl dagní la reabiltaziun che vá debojëgn a Bad Häring, á la Junta provinziala tut la dezijiun sön proposta dl’assessuria por la sanité Martha Stocker, da renové la convenziun cun le zënter de reabilitatiziun cina la fin dl 2018. Paralelamënter laora la Provinzia, che n’á nia n zënter spezialisé sciöche chël tirolej, por realisé tl Südtirol n zënter de competënza por la reabilitaziun de porsones che á albü n’amputaziun.
Le zënter de Bad Häring á 136 lec y tol sö vigni ann zirca 1100 paziënc. La pröma fasa dla reabilitaziun do n’amputaziun döra mesanamënter trëi mëisc. La tarifa al de tla strotöra austriaca é de incër 400 euro.
USP
