Atualità
Oblianza di montli da d'invern dai 15 de novëmber
Dai 15 de novëmber jarál en forza l’oblianza da adoré i montli da d’invern o morones ti caji de nëi y/o formaziun de dlacia sön strada. L’Ofize Motorisaziun aconsëia da se crüzié bele da sëgn dl barat di montli.
L’Ofize Motorisaziun informëia che dai 15 de novëmber mëss i veicui tl Südtirol ester atrezá cun montli da d’invern o morones ti caji de nëi y/o la formaziun de dlacia sön strada. „I montli da d’invern o les morones por la nëi é indespensables, porchël dess ince düc i autisć y les autistes se atrezé por l’invern y daidé da aumenté insciö ince la segurëza sön strada“, sotlignëia l’assessur por la mobilité y le sorvisc strades Florian Mussner. Sön l’autostrada dl Prener vel l’oblianza dl’adoranza di montli da d’invern o dles morones te auto tresfora belanfat cares che é les condiziuns dl meteo dai 15 de novëmber ai 15 de aurí.
Por evité tëmps de speta lunc aconsiëia l’Ofize Motorisaziuns dla Provinzia da se crüzié abonora por l’atrezadöra invernala tles fujines. Por le barat él scrit dant n mëis de tëmp cina ai 15 de novëmber. „Por avëi na buna aderënza sön na strada da nëi él aconsié da avëi montli nia plü vedli de cater agn y cun na profondité minima dl „battistrada“ de almanco cater milimetri“, insciö Markus Kolhaupt dl Ofize Motorisaziuns dla Provinzia.
rc
