Atualità
Families: n miliun dala Regiun, plü sostëgn por le tëmp de paternité
N miliun de euro implü por les families: chësta soma é gnüda aprovada inier ai 21 d’otober dala Junta regionala y ti pormët insciö ala Provinzia de Baslan da ativé na seria de proiec. Chël plü important reverda le sostëgn al tëmp de paternité damané dai peri.
Les ressurses finanziares metüdes a desposiziun dala Regiun Trentin-Südtirol é avisa de 966mile euro y la delibera dl govern regional ti conzed la poscibilité ala Provinzia da definí autonomamënter les ressurses assegnades. „Cun chësc finanziamënt – sotlignëia l’assessuria Waltraud Deeg – sarál poscibl da scomencé na seria de proiec che i conscidrun de gran valüta por le setur dles families.“ Le plü important, ince dal punt de odüda economich (investimënt preodü de 700mile euro) reverda le sostëgn dl tëmp de paternité tl pröm ann y mez do la nasciüda di mituns.
„Nosta intenziun é chëra da favorí le tëmp de paternité volontar di peri – insciö Deeg – y da sostigní les families tles periodes de palsa dal laur da pert di geniturs.“ La proposta dl’Agenzia pro les families prevëiga la conzesciun de n contribut al mëis de 400 euro por i peri che laora tl setur privat y che ciafa 30 porcënt dl paiamënt tratan le tëmp de paternité y n contribut de 800 euro sce al ne é preodü degun paiamënt tratan la perioda de paternité. Chësc por indöt trëi mëisc y cina le pröm ann y mez do la nasciüda di mituns. „I orun sostigní l’adoranza dl tëmp de paternité – spliga l’assessuria – y alisiré te chësc vers la dezijiun al’intern dles families por promöie na cultura dla condivijiun canche ara nen vá dla cura di mituns.“
rc
