Atualità
300 abitaziuns IPES nöies ti proscims 5 agn
Le program dles costruziuns dl Istitut por le frabiché sozial IPES por i agn 2016-2020 contëgn la realisaziun de indöt 300 abitaziuns nöies por n investimënt complessif de 75 miliuns de euro. La planificaziun é gnüda presentada incö, ai 30/10, tla sënta dl IPES da Balsan dal assessur por le frabiché abitatif Christian Tommasini. Tl program él ince 5 abitaziuns nöies a Urtijëi y 6 a Ciastel.
Indöt 300 é les abitaziuns che é preodüdes aladô dl program dles costruziuns dl Istitut por le frabiché sozial IPES por i proscims cinch agn 2016-2020. Sciöche valur mesan él preodü la realisaziun de 60 abitaziuns al’ann cun n investimënt de 15 miliuns vigni ann. Le cost mesan araté por vigni abitaziun é de zirca 250mile euro, l’investimënt complessif é de indöt 75 miliuns de euro.
Aladô dla programaziun él preodü la costruziun de 59 abitaziuns tl 2016, 66 tl 2017, 75 tl 2019 y 34 tl 2020. Indöt él 20 i Comuns che é gnüs inseris tl program dl frabiché 2016-2020, cun indöt 5 abitaziuns nöies inserides tl program tl Comun de Urtijëi y 6 tl Comun de Ciastel. Por ci che reverda le Comun da Balsan él preodü dui proiec por abitaziuns IPES nöies: öna prevëiga na ciasa por lerneri a Haslach cun 55 abitaziuns y l’ater proiet reverda la zona d’espanjiun Druso Est, olache al gnará realisé 40 abitaziuns. La costruziun de 5 abitaziuns nöies é preodüda tl Comun da San Laurënz, 18 a Porsenú y 45 a Bornech.
L’assessur por le frabiché abitatif Christian Tommasini á dit che „por le pröm iade él poscibl da avëi sigurté de n finanziamënt costant por cinch agn alalungia y chësc nes consënt da avëi na miú planificaziun dl program dl IPES.“ Ince le presidënt dl IPES Heiner Schweigkofgler á sotligné l’importanza da avëi n plann costant y de plü agn por la costruziun dles 300 abitaziuns IPES por ti jí adincuntra ince ales ghiranzes di Comuns.
Atri 75 miliuns de euro vëgn metüs a desposiziun por le ressanamënt dles abitaziuns IPES bele esistëntes por i proscims cinch agn. Le program por le frabiché 2016-2020 dl’IPES é gnü aprové ofizialmënter dala Junta provinziala tla sentada da en mertesc ai 27 d’otober do che ince le Consëi di Comuns á dé so arat positif. Ala presentaziun dl program 2016 - 2020 ál incö (30/10) ince tut pert le diretur dl Departimënt por i laurs publics dla Provinzia Paolo Montagner, le diretur dla Repartiziun Frabiché abitatif Wilhelm Palfrader y le vizepresidënt dl IPES Renzo Caramaschi.
Retrac:
http://we.tl/YvpfDwq24X
Intervista cun l'assessur Christian Tommasini:
http://we.tl/Xx2MdNidVT
Intervista cun le presidënt dl IPES Heiner Schweigkofler: http://we.tl/ozMP5sRxU7
Intervista cun Gianfranco Minotti:
http://we.tl/VXCo50Rg1U
Files audio (Tommasini - Schweigkofler - Minotti):
http://we.tl/lgciMUNCi2
rc
