Atualità
Reforma sanitara: scomenciada l’analisa dles prestaziuns di ospedai
Incö domisde (ai 9 de novëmber) él gnü a se le dé la pröma incuntada di suranstanc dl Departimënt Sanité y dl’Aziënda sanitara provinziala por definí l’organisaziun dles prestaziuns sanitares tl dagní ti set ospedai provinziai y di sorvisc dl’Aziënda sanitara.
La programaziun nöia dl’oferta sanitara di set ospedai dl Südtirol é öna dles fondamëntes dl prozes de ajornamënt „Assistënza sanitara provinziala 2020“ y chësc sides por ci che reverda l’assistënza sanitara söl post co ince ti ospedai. Incö domisde, lönesc ai 09 de novëmber, él gnü tigní a Balsan la pröma incuntada di suranstanc dl Departimënt Sanité adöm al’Aziënda sanitara provinziala por definí l’organisaziun dles prestaziuns sanitares ti set ospedai dl Südtirol y di sorvisc dl’Aziënda sanitara. Danterater él ince gnü baié di aspec prinzipai dla programaziun dla reforma y da concordé i proscims vari te chësc setur.
„N valgönes dles diretives prinzipales dl proiet 'Assistënza sanitara provinziala 2020' é na majera colaboraziun y n renforzamënt dla rëi di set ospedai, na miú armonisaziun dl’oferta dl’assistënza sanitara sön le teritore y n’otimisaziun sön la basa dles ghiranzes di paziënc“, á sotligné l’assessuria Martha Stocker tratan la sentada. Te chësc contest fej l’assessuria referimënt a n model progressif dl’assistënza sanitara a livel provinzial y a na maiú colaboraziun danter i Raiuns sanitars desvalies, dantadöt él preodü che ti raiuns sanitars de Maran, Porsenú y Bornech laorará tl dagní i dui ospedai de vigni raiun (Bornech y Sanciana, Porsenú y Sterzing, Maran y Schlanders) sciöche „un n ospedal cun döes sëntes“.
N pröm vare te chësc prozes de programaziun dl'assistënza tlamada „intra moenia“ é chël dla debatüda tres workshops spezifics danter i suranstanc sanitars adöm cun i suransranc dl personal infermieristich di cater raiuns sanitars y di trëi seturs dla medejina interna, dla chirurgia generala y dl’ortopedia de düc i set ospedai provinziai.
rc
