Atualità
Dala Junta: Finanziamënt de 6 films y documentars
La Junta provinziala á aprové incö ai 10 de novëmber la terza pert dl 2015 di finanziamënc por films y documentars realisá tl Südtirol. I esperc y la Business Location Südtirol (BLS) á chirí fora sis proiec da sostigní tres le Fonds südtirolej por les produziuns.
Dan l’aprovaziun da pert dla Junta â la Comiscun de valutaziun ametü al finanziamënt sis dles 18 produziuns presentades ala terza tlamada dl ann. La soma a desposiziun dla terza pert dl finanziamënt provinzial é de zirca 1,5 miliuns de euro.
La condiziun prinzipala por ciafé n finanziamënt publich é chëra che les produziuns televisives y dl cinema reinvestësc almanco le 150 porcënt dl contribut conzedü. Por chël che reverda la terza pert dl finanziamënt dla Provinzia de 1,535 miliuns de euro é la retüda economica stimada di sis proiec de 2,6 miliuns de euro. Indöt él preodü 113 dis de rapresentaziuns cun aturs y profescionisć locai y fornidus de sorvisc südtirolej. “Al se trata de na fujina locala che tol ite indöt cincanta categories profescionales dai artejans cina a impreses desvalies”, á dit le presidënt Arno Kompatscher.
Trëi dles sis produziuns finanziades, avisa le mez, é südtirolejes, öna na produziun vëgn dala Talia, öna dala Germania y öna dal’Austria. Danter i proiec finanziá él ince da ciafé le film dramatich „Figli della notte“ de Andrea De Sica realisé daldöt tla Val Venosta, „Iceman-Rache“, n film sperimental sön Ötzi dla Echo Film dl Südtirol. Dui documentars reverda indere na tematica che á da nen fá diretamënter cun le Südtirol: un reverda l’inondaziun dla Val Venosta y l’ater Luis Trenker. Aladô dles diretives dla Junta vëgnel finanzié produziuns olache le Südtirol é da odëi te na manira tlera tl film o documentars che fej referimënt al Südtirol o proiec de promoziun de artisć dl post y de ciases de produziuns locales.
rc
