Atualità
Dala Junta: bus direc por la Svizera, coliamënc prorogá por trëi agn
Al é gnü prolungé ciamó por trëi agn i coliamënc direc cun le bus danter la Talia y la Svizera sön la trassa danter Müstair-Mals y Martina-Nauders-Mals. La convenziun, a chëra che al tol pert la Provinzia de Balsan, le Ciantun di Grijiuns, la SAD y le PostAuto Schweiz, é gnüda aprovada incö, ai 24 de novëmber dala Junta provinziala sön proposta dl assessur Florian Mussner.
L’assessur Mussner é dla minunga che “le sorvisc de trasport publich danter le Südtirol y la Svizera rapresentëia ciamó n vare inant tl vers de n sistem integré tres plü internazional, sura i confins, che vá tl vers de na mobilité sostenibla. Por mirit dl bus danter Mals y Müstair vára da cherié n coliamënt danter la Val Venosta y la ferata retica: insciö án manco de sis ores por rové da Maran a Turic, presciapüch n’ora de manco co cun le coliamënt “classich” tres le Prener”. Incö él gnü dé strada lëdia y l’assessur Florian Mussner é gnü inciarié da sotescrí la convenziun por la prorogaziun de trëi agn dl’acordanza danter la Provinzia de Balsan, le Ciantun di Grijiuns, la SAD y le PostAuto Schweiz: insciö vëgnel garantí inant i coliamënc Müstair-Mals y Martina-Nauders-Mals cina de dezëmber dl 2018.
Por ci che reverda la linia Müstair-Mals che vá spo inant cina Zernez y che funzionëia dal 2005 inant por cunt dl PostAuto Schweiz, él vigni ora n coliamënt tratan l’isté y vigni döes ores tratan le rest dl ann y al vëgn trasporté prësc 86.000 porsones te n ann. Dl 2012 él gnü pormez a chësta linia le coliamënt Martina-Nauders-Mals, gestí daldöt dala SAD. La spartiziun dl pëis finanziar por les döes linies vëiga danfora por l’ann 2015/2016 che la Provinzia de Balsan surantoles 301.000 euro di cosć por le coliamënt Müstair-Mals y 241.500 euro por le coliamënt Martina-Nauders-Mals.
Ci che é ciamó interessant da savëi: le percurs danter Mals y Müstair é debann por che che á l’Abo+, le Südtirol Pass 65+, la Mobilcard, la Bikemobilcard y la Museumobil Card, che che á le Südtirol Pass paia 0,50 zentejimi por le toch danter Mals y le confin de Stat y dötes les atres porsones paia por le medemo toch 1,50 euro (a che che vá sura le confin ti vëgnel apliché la tarifa dl PostAuto Schweiz). Les porsones abonades al sistem tarifar svizer y che che á n’oferta turistica locala ne paia nia sön le toch danter Mals y Martina, dötes les atres indere (sides por le toch tl Südtirol che por le toch sura le confin fora) mëss se cumpré na cherta dl trasport integré dl Südtirol.
OSP
