Atualità
Te Südtirol 372 implanc portamunt - Gherdëna cun la capazité plü alta
Tl 2014 ê le numer di implanc portamunt te Südtirol indöt 372 cun na capazité de trasport de 512.126 passajiers al’ora. Chisc dac y tröc de plü é contignüs tla brosciüra nöia dl Ofize Implanc portamunt. „Por le bun funzionamënt dla sajun da d’invern é chisc implanc un di pilastri plü importanc por le turism“, sotlignëia l’assessur Florian Mussner. Dui lifc nüs é gnüs realisá tl'Alta Badia.
„Cun indöt n volum d’afars anual de 280,5 miliuns de euro é chësc setur di implanc portamunt na ressursa fondamentala ince por ci che reverda le svilup de nosta economia“, recorda l’assessur por la mobilité Florian Mussner. Na panoramica dla situaziun tl setur dles furnadoies (numer di implanc, lunghëza, dac, portada, personal, investimënc, raporc cun i agn da denant y les arees vijines) é contignüda tl codejel nü „Implac portamunt tl Südtirol“ lauré fora dal Ofize provinzial implanc portamunt.
Tl 2014 él gnü fat sö indöt 6 implanc nüs: danter Corvara y Calfosch tl’Alta Badia él gnü baraté fora le lift dai scagns „Borest“ cun n implant da cabines nü cun 8 posć y al é gnü baraté fora ince le vedl implant dai scagns „Pralongia“ cun n aumënt da trëi a sis posć. Tl’Alta Val de Puster él gnü realisé le coliamënt danter i raiuns dai schi Rotwandwiese y Helm cun la costruziun de dui implanc da cabines da 8 posć. Implü él gnü realisé l’implant da cabines che coliëia i raiuns dai schi Sulden-Kanzel cun le ju de Madritsch, tla Val d’Ega él gnü baraté fora le lift dai scagns „Tschein“. „La maioranza di implanc é gnüda realisada por la sajiun da d’invern, ince sce ti ultims agn vëgnel tres plü adoré i implanc portamunt ince tratan la sajiun da d’isté“, insciö le diretur dl ofize Markus Pitscheider.
La capazité de trasport cun la portada al’ora plü grana di implanc portamunt tl ann 2014 é, bele sciöche ti agn passá, le raiun dai schi Gherdëna-Munt de Sëuc cun 110.782 porsones al’ora, al secundo post él da ciafé l’Alta Badia (83.226) y daldô la Val de Puster (66.407 porsones pro ora). La brosciüra nöia „Implanc portamunt tl Südtirol“ é da ciafé debann pro l'Ofize provinzial Implanc portamunt a Balsan, plaza Magnago 3, tel. 0471 414600.
rc
