Atualità
Contribuc por radio, tv y portai d’informaziun: aprovaziun di criters
La Junta provinziala á aprové incö (01/12) i criters por la promoziun dles impreses de comunicaziun locales sön la basa dla lege provinziala nöia. La domanda do compensaziuns finanziares pó gní fata dales emitënzes televisives, dai radii privac locai y dales plates internet d’informaziun locala.
Da setëmber de chësc ann él gnü aprové la lege nöia elaborada dala Junta che ajornëia les mosöres de promoziun tl setur dl’informaziun tl Südtirol. Incö (al 01/12) á la Junta provinziala aprové i criters che regolamentëia les modalités de conzesciun dles compensaziuns finanziares ales emitënzes radio y televijiuns locales y ai portai d’informaziun locala. Al se trata de contribuc de un n iade por la defujiun de sorvisc d’interes economich general.
Deache chësta ativité d’informaziun á debojëgn de na strotöra tecnica spezifica garantësc i criters por vigni impresa n contribut fis por la curida di cosć de gestiun y de manutenziun. Por chësta spëisa él preodü le 20 porcënt dl budget anual, che gnará partí sö sön dötes les impreses che podará s’anuzé de chësta sovenziun.
Le 80 porcënt dl budget anual che resta vëgn spo partí sö aladô de n sistem a punc y dl’aplicaziun de coefiziënc sön la basa de parameters desvalies che reverda: i dac dl’utënza mesana al de dles emitënzes televisives y radio aladô dl’inrescida ASTA plü atuala, por i portai online i dac sön l’adoranza mesana al de stabilida aladô de n’analisa spezifica dl Comité provinzial por la comunicaziun, le cost dl laur di dependënc cun contrat a tëmp indeterminé adorá cun continuité tl’elaboraziun y tla defujiun di contignüs, les corespondënzes paiades ales agenzies y a d’atri sogec che é gnüs inciariá dal’impresa y che s’anüza de chisc por la produziun y la defujiun di contignüs sot a contribut. La definiziun avisa di contribuc vëgn spo stabilida dal Comité provinzial por la comunicaziun che ti presentará na lista ala Repartiziun competënta cun les impreses aproades y les somes calcolades por vigni impresa.
N aspet particolar di criters aprová dala Junta reverda i forums online, por chi che al vëgn ativé na moderaziun cualitativa: öna na condiziun reverda les prescriziuns bele preodüdes por i manajadus di forums, cun n’atra condiziun vëgnel ince damané la registraziun di utënc tres la comunicaziun de inom, cognom, misciun, password, numer dl utënt y misciun email. L’ativaziun de vigni utënt messará ince gní garantida aladô de na prozedöra scrita dant.
La Junta fajará implü tl 2016 na valutaziun dl’efiziënza di criters por mudé i criters sce nezesciar. Les impreses pó bele presenté les domandes por l’ann 2015, le budget a desposiziun por le pröm ann é de un n miliun de euro.
rc
