Atualità
Kompatscher sön la lege söi apalc nöia: favorí l’economia y l’ocupaziun
„Öna dles leges plü importantes dla legislatöra“: insciö definësc le presidënt dla Provinzia Arno Kompatscher la lege che regolamentëia i apalc publics aprová incö ( ai 4 de dezëmber) dal Consëi provinzial. „Cun la lege nöia él psocibl da mët les fondamëntes por garantí de miú condiziuns al’economia y por sostigní l’ocupaziun“, spliga Kompatscher.
„Un di obietifs prinzipai dla Junta provinziala ê chël da mioré le cheder dles condiziuns por l’economia, da sostigní na chersciüda y da favorí la creaziun de posć de laur nüs. Öna dles mosöres zentrales é la lege söi apalc publics nöia“, sotlignëia le presidënt Kompatscher. Tres la lege nöia vëgnel rezepí les diretives europeiches nöies dl 2014 y al vëgn introdüt na seria de sauridanzes che reverda l’organisaziun y la burocrazia, „ince por avëi plü flessibilité pro les prozedöres de surandada y da avëi na maiú sigurté iuridica“, insciö Kompatscher.
Cun la lege provinziala nöia ará le Südtirol na normativa plü tlera y unitara tl setur dl apalc publics y al sará ince la pröma regiun taliana, y öna dles prömes a livel europeich, da avëi na lege tl chësc setur cun na funziun de governance sön dötes les staziuns d’apalt presëntes sön le teritore. La Provinzia podará eserzité deplëgn de sües „competënzes te chësc setur, ince deache al é sté poscibl, adöm a nüsc parlamentars a Roma y ai esperc dl’Agenzia provinziala da renforzé nostes competënzes te chësta materia tres na lege delega dl Stat“, recorda Kompatscher.
D’atri aspec zentrai dla lege nöia, che é gnüda elaborada adöm ai partners soziai y ai grups d’interes, reverda ince n aumënt dla trasparënza y dles sauridanzes, n azes plü asvelt ai apalc publics por les piceres impreses y chëres mesanes y n sostëgn al percurs de produziun local dl’economia regionala.
rc
