Atualità
La relaziun sön le marcé dl laur confermëia l’andamënt positif
Le marcé dl laur dl Südtirol s’á indô remetü ti ultimi sis mëisc: Chësc vëgn confermé dala relaziun provinziala sön le marcé dl laur, che é gnüda presentada incö danmisdé (ai 14 de dezëmber) dal’assessuria por le laur Martha Stocker, dal diretur de Repartiziun Sinn y dal diretur d’ofize Luther. Le raport atual se dá ince jö cun les conseguënzes dla reforma dl marcé dl laur, le „Jobs Act“.
L’assessuria por le laur Martha Stocker, le diretur dla Repartiziun Laur Helmut Sinn y le diretur dl Ofize Osservaziuns marcé dl laur Stefan Luther á presenté incö, lönesc ai 14 de dezëmber, la relaziun sön le marcé dl laur por le secundo semester 2015. Les chestiuns zentrales é stades le mioramënt general dl marcé dl laur südtirolej ti ultims sis mëisc y n pröm bilanz sön les conseguënzes dla reforma dl marcé dl laur statala.
„L’evoluziun vá te na direziun positiva. Bele tl scomenciamënt dl ann él gnü a se le dé n svilup positif tl marcé dl laur provinzial“, á dit l’assessuria por le laur Stocker. Döes dles rajuns de chësta chersciüda te prësc vigni setur – ince tl frabiché - é por l’assessuria Stocker da öna na pert le svilup dla situaziun economica en general, sciöche ince les mosöres dla Junta provinziala por ejëmpl tres alisiraziuns fiscales y impulsc finanziars. L’aumënt dl’ocupaziun é stada dl 1,2 porcënt plü alta en confrunt co tratan le medemo tëmp l’ann passé te prësc düc i seturs.
Le diretur dla Repartiziun Laur Sinn á analisé tratan la conferënza le mioramënt dla situaziun dl marcé dl laur y á dit, che le trend positif dl aumënt dl’ocupaziun vá ince inant tratan le mëis de novëmber cun n aumënt dl 2 porcënt. Le svilup dl marcé dl laur südtirolej ti mëisc danter ma y otober é gnü descrit da Sinn cun n valgönes osservaziuns: aumënt dl’ocupaziun de 2270 posć de laur (+1,2 porcënt), aumënt alt di dependënc da d’atres Regiuns dla Talia, aumënt alt dl’ocupaziun de zitadins da foradecá (+4 porcënt), smendrimënt sterch de situaziuns de laur precaries (contrac a proiet y laur a tlamada), gran aumënt pro la formaziun de lernerat y da cater agn na diminuziun dla dejocupaziun de prësc cater porcënt.
Na tematica ince tratada tl’ediziun atuala dl foliet „Arbeitsmarktnews“ é les conseguënzes dl „Jobs Act“ (plü ocupaziun, manco situaziuns de laur precaries, eliminaziun di contrac a proiet). Ti pröms 10 mëisc dl 2015 él gnü firmé 11.000 contrac a tëmp indeterminé, chësc é n aumënt de 5.000 en confrunt co l’ann passé cun implü la converjiun de 6.000 contrac a tëmp determiné te contrac a tëmp indeterminé. Les mosöres ne á indere nia cherié plü posć de laur, che é plü na conseguënza dl mioramënt dla situaziun economica en general. Le diretur d’ofize Luther á sotligné inant che i dac plü atuai dl setur dl frabiché vá tla dërta direziun. „Do nosta rata dess la situaziun se stabilisé“, insciö Luther. Le setur dles finanzies á indere da se dé jö cun na restrotoraziun che porta ince para che plü posć de laur vëgn tuc demez. „Te chësc setur vál atualmënter plü posć a perde, co che al ne vëgn cherié de nüs“, stlüj jö Luther.
rc
