Atualità
Assessur Mussner: Complimenc’ ai trëi studënc’ ladins che à stüt jö l’ejam de stat cun 100 punc’
OSP - L’assessur ladin Florian Mussner fej i complimënc’ ai studënc’ ladins che à stlüt jö l’ejam de stat. Les döes studëntes y le studënt cun le mascim resultat è gnüs congratulà cun n telegram. Les aodanzes dl assessur por le dagnì de chëstes studëntes y de chisc studënc’.
Dassënn cuntënt é l’assessur ala scora ladina Florian Mussner cun i resultać ćina sëgn publicà di ejams de stat tles scores ladines. Düć à superè l’ejam final dla scora alta, che vëgn sëgn fat dan da comisciuns internes cun n presidënt da defora. Suradöt i trëi studënć’ (döes studëntes y un n studënt): Sabine Piazza dl ITC de Urtijëi, Pescoller Albina y Ploner Michael dl ITC da La Ila à fat onur ala scora ladina cun l’avëi arjunt le mascim resultat de 100/100. L’assessur à incö danmisdé congratulè i 3 studënć cun n telegram.
Chësc é n bun restultat por la scora ladina, che ne à nia gonot odü le mascim di punc’ assegnà. Tl ITC da La Ila él le 1. iade che al vëgn arjunt le mascim di punć, dij l’assessur do s’avëi informè pro le diretur Josef Irsara.
L’aodanza dl assessur é che inće i resultać dla scora d’ert de Urtijëi gnarà fora chisc dis portes inće de beles sodesfaziuns por i studënć instësc, por les families y por la scora instëssa.
A dötes les studëntes y ai studënć che à stlüt jö y che stlujarà ćiamò jö l’ejam chisc dis tles valades ladines y defora, va les aodanzes dl assessur – por na buna lîta dl tru da tó do chësc ejam, sides por le monn dl laûr co por le stüde.
OSP
